Aksion antidrogë në Maqedoni: 20 të arrestuar dhe sekuestrohen sasi të mëdha narkotikësh gjatë fundjavës

Ministria e Punëve të Brendshme ka bërë të ditur se gjatë periudhës nga 2 deri më 4 tetor, pjesëtarët e policisë përmes ekipit të koordinuar "Task Force" kanë ndërhyrë në 13 raste të ndryshme që lidhen me shpërndarjen e paligjshme të lëndëve narkotike në disa rajone të vendit. Sipas autoriteteve policore, gjatë kontrolleve intensive dhe bastisjeve të ushtruara ndaj personave, automjeteve dhe objekteve të ndryshme, janë kapur sasi konsiderueshme droge dhe janë vënë në pranga 20 persona, ku mes tyre figurojnë edhe dy shtetas të huaj, përkatësisht nga Polonia dhe Republika e Çekisë. Në njoftimin zyrtar theksohet se në qytetin e Strumicës janë sekuestruar 59 bimë marihuane me një peshë totale prej rreth 680 kilogramësh, ndërsa në kryeqytet, në Shkup, është zbuluar një sasi prej rreth 800 gramësh marihuanë. Po ashtu, gjatë operacionit në Veles janë konfiskuar lëndë narkotike të llojit kokainë, substanca të tjera të ndaluara dhe rreth 5 mijë euro para të gatshme. Ndërkohë, në katër lokacione të tjera janë zbuluar rreth 200 gramë kokainë, 505 mililitra vaj hashashi dhe 4,58 gramë marihuanë. Nga MPB bëjnë me dije se ndaj të dyshuarve do të ngrihen kallëzime përkatëse penale.