Dhuna ndaj deputetit Fahrush Rexhepi, reagon ashpër Arbërie Nagavci: Veprim i turpshëm dhe i papranueshëm

Kreu i Grupit Parlamentar të Lëvizjes Vetëvendosje, Arbërie Nagavci, ka dalë me një reagim të fortë lidhur me ngjarjen e ndodhur së fundmi, ku deputeti Fahrush Rexhepi u sulmua fizikisht, duke u kapur për duarsh dhe shtyrë nga një grup protestuesish. Nagavci e ka dënuar këtë akt, duke e quajtur atë të turpshëm dhe krejtësisht të patolerueshëm, ndërsa ka nënvizuar se revoltë apo pakënaqësitë nuk mund të justifikojnë kurrsesi ushtrimin e dhunës ndaj një zyrtari të shtetit. “Pamjet ku protestuesit e kapin për duarsh dhe e shtyjnë me forcë një deputet të Republikës së Kosovës nuk kanë asgjë të përbashkët me të drejtën demokratike për protestë. Protesta është e drejtë, kritika është e drejtë, kërkesa për llogaridhënie është e drejtë, por askush nuk ka të drejtë të përdorë forcën fizike ndaj një përfaqësuesi të zgjedhur të qytetarëve”, ka shkruar ajo në reagimin e saj. Në vijim, zyrtarja e lartë e partisë ka kujtuar profilin e nderuar të profesorit universitar dhe doktorit të shkencave të historisë, Fahrush Rexhepi, duke vënë në dukje kontributin e jashtëzakonshëm të familjes së tij për lirinë e vendit. Ajo ka kujtuar se vëllai i deputetit, dëshmori Njazi Rexhepi, ka dhënë jetën si pjesëtar i Brigadës 138 “Agim Ramadani” në Betejën e Koshares, kurse vëllai tjetër, Jonuz Rexhepi, është veteran i Ushtrisë Çlirimtare të Kosovës. “Askush nuk fiton të drejtën të ushtrojë dhunë duke u thirrur në emër të UÇK-së, aq më pak ndaj një njeriu, familja e të cilit ka paguar me gjak çmimin e lirisë së Kosovës”, ka deklaruar Nagavci, duke shtuar se aktet e tilla nuk i shërbejnë mbrojtjes së vlerave të luftës. “Kjo nuk është mbrojtje e vlerave të luftës. Kjo është cenim i tyre”, ka përfunduar ajo.