Sukses historik në Britani: Forca e Sigurisë së Kosovës shkëlqen me medalje të artë në “Cambrian Patrol”

Pjesë e aktiviteteve bilaterale me Mbretërinë e Bashkuar, një skuadër e Forcës së Sigurisë së Kosovës ka marrë pjesë në njërën nga garat më prestigjioze dhe sfiduese ushtarake në glob, “Cambrian Patrol”, e cila organizohet traditicionalisht nga Ushtria Britanike. Në këtë edicion, djemtë dhe vajzat e FSK-së kanë arritur të rrëmbejnë medaljen e artë, duke lënë pas një konkurrencë të fortë prej dhjetëra shtetesh. Përfaqësimi i Kosovës në këtë ngjarje ndërkombëtare ka dëshmuar edhe një herë shkallën e lartë të gatishmërisë, përgatitjes fizike dhe taktike të ushtarakëve tanë. Për vite me radhë, trupat e FSK-së dëshmojnë sukses të vazhdueshëm në këtë pistë sfidash, duke u kurorëzuar rregullisht me mirënjohje të larta falë profesionalizmit dhe disiplinës së treguar. Sfidës së këtij viti iu përgjigj me sukses njësiti nga Regjimenti i Parë i Këmbësorisë, që funksionon në kuadër të Komandës së Forcave Tokësore. Ky kontingjent arriti të ngjitet në majën e podiumit, duke u stolisur me arin mes dhjetëra skuadrave elitare ndërkombëtare që synonin të njëjtin trofe.