Emërimi i Vlora Hysenit në krye të SHISH, gazetari Lita: Yuri Kim kishte paralajmëruar, ja pse institucionet shqiptare injoruan partnerët

I ftuar në një studio televizive këtë të dielë, gazetari Lavdrim Lita ka komentuar zhvillimet e fundit dhe rolin e partnerëve ndërkombëtarë në emërimet e zyrtarëve të lartë në institucionet kyçe të vendit, duke u ndalur te rasti i ish-drejtoreshës së SHISH, Vlora Hyseni, dhe profili i diplomatit të ri amerikan në Tiranë, Eric Wendt. Gjatë fjalës së tij, Lita theksoi se politika shqiptare shpesh kërkon mbështetje dhe orientim nga partnerët ndërkombëtarë për reformat, por theksoi se sugjerimet e tyre nuk merren gjithmonë parasysh. Ai solli në vëmendje paralajmërimin e ish-ambasadores amerikane, Yuri Kim, lidhur me papërshtatshmërinë e Vlora Hysenit për të drejtuar Shërbimin Informativ Shtetëror. Sipas gazetarit, megjithëse institucionet tona dëgjuan paralajmërimet e diplomates amerikane, vendimmarrja përfundimtare u bë sipas interesave të kryeministrit Edi Rama, ndërsa pasojat e këtij emërimi u panë qartë vetëm dy vite më vonë. Për këtë arsye, ai sugjeroi që autoritetet shqiptare duhet t'i dëgjojnë më shumë partnerët ndërkombëtarë, të cilët shpesh disponojnë më shumë informacione rreth profileve të drejtuesve. Në lidhje me ambasadorin e ri të SHBA-së në Tiranë, Eric Wendt, Lita ndau përshtypjet e marra nga zyrtarët shqiptarë që kanë bashkëpunuar më herët me të. Sipas dëshmive nga koha e misionit në Afganistan, ku Wendt ka shërbyer si gjeneral i forcave speciale të Ushtrisë Amerikane, ai përshkruhet si një personalitet këmbëngulës dhe i vendosur për të realizuar objektivat e tij misionare. Në përmbyllje, gazetari vuri në dukje rëndësinë e dhënies së kohës së mjaftueshme diplomatit të ri për t'u njohur nga afër me strukturat institucionale, bashkëpunëtorët dhe mënyrën se si do të ndërtohet qasja e tij në vendin tonë.