Danimarka merr fitore minimale në Uells, vendos gabimi i portierit Ward

Përfaqësuesja e Danimarkës ka arkëtuar tri pikë të arta në udhëtimin ndaj Uellsit, duke triumfuar me rezultatin e ngushtë 1:0 në kuadër të Ligës A të Kombeve. Përballja u vendos nga një penallti e shndërruar në gol në fraksionin e dytë të lojës. Momenti kryesor i takimit erdhi si pasojë e një gabimi fatal të portierit vendas, Danny Ward. Gardiani i Wrexham-it gaboi në pasim brenda zonës së rreptësisë, duke ia dhuruar topin sulmuesit Gustav Isaksen. Në tentativë e sipër për të ndrequr lëshimin e tij, Ward ndërhyri gabimisht ndaj Isaksenit, duke detyruar gjyqtarin kryesor që të tregonte menjëherë nga pika e bardhë e penalltisë. Sulmuesi Rasmus Højlund u tregua i saktë nga 11-metërshi në minutën e 75-të, duke mposhtur portierin me një goditje të qetë. Ky sukses i jep Danimarkës fitoren e radhës ndaj uellsianëve, pas triumfit 2:0 të regjistruar në Kopenhagë gjatë fundjavës së kaluar. Pas këtyre ndeshjeve në Grupin 4, kreu mbahet nga Portugalia me 12 pikë, e ndjekur nga Danimarka me 6 pikë, ndërsa Uellsi dhe Norvegjia mbyllin renditjen me nga 3 pikë secila.