Rangnick pas barazimit në Prishtinë: Kosova zhvilloi ndeshje të shkëlqyer, jemi të lumtur me ecurinë

Përfaqësuesja e Austrisë ka barazuar me rezultatin 1:1 në udhëtimin e saj në Kosovë. Edhe pse selektori austriak, Ralf Rangnick, nuk u tregua plotësisht i kënaqur me çdo aspekt të lojës së skuadrës së tij, ai theksoi se është jashtëzakonisht i lumtur me bilancin prej tetë pikëve të grumbulluara nga katër ndeshjet e para. "Kosova bëri një paraqitje shumë të mirë. Ne kishim mjaftueshëm pasaktësi në lojën tonë, dhe jo të gjitha këto mund t'i faturohen vetëm gjendjes jo të mirë të fushës," u shpreh trajneri i kombëtares austriake pas përfundimit të sfidës. Pavarësisht vështirësive, Rangnick veçoi si pikë kyçe karakterin e fortë dhe moralin e lartë të grupit të lojtarëve të tij në fushën e blertë. "Për herë të dytë radhazi, pasi u gjendëm në disavantazh, ia dolëm të kthehemi në lojë. Kjo dëshmon qartë se sa e bashkuar dhe solide është kjo skuadër. Sidoqoftë, jemi të vetëdijshëm se kemi ende hapësirë për t'u përmirësuar," shtoi ai. Në një përmbledhje të përgjithshme, tekniku austriak shprehu kënaqësinë e tij për tetë pikët e arkëtuara deri më tani. "Në katër takime kemi realizuar nëntë gola, dhe një statistikë e tillë nuk është diçka që mund të merret thjesht si e mirëqenë." Paraqitjet pozitive të shumë futbollistëve gjatë kësaj periudhe, përfshirë edhe emrat e rinj, pritet t'i sjellin atij sfida të reja në procesin e përzgjedhjes për ndeshjet e ardhshme. "Shumë lojtarë e kanë dëshmuar veten në fushë. Është e vështirë të veçoj qoftë edhe një lojtar të vetëm që ka qenë nën nivelin e pritur," theksoi Rangnick. Në fund, ai bëri të aijtur se pret rikthimin e futbollistëve të dëmtuar deri në muajin nëntor, gjë që do ta bëjë edhe më konkurruese dhe sfiduese detyrën e tij për të zgjedhur grupin përfundimtar.