Seancë e jashtëzakonshme në Kuvend: Në fokus ndryshimet për Dhomat e Specializuara dhe agjenda e ngjeshur ligjore

Kuvendi i Kosovës ka bërë publike agjencinë e plotë për seancën e jashtëzakonshme parlamentare, e cila do të nisë punimet nesër, duke filluar nga ora 09:00. Sipas njoftimit zyrtar, në krye të rendit të ditës do të jetë shqyrtimi i parë i Projektligjit për ndryshimin dhe plotësimin e Ligjit për Dhomat e Specializuara. Zhvillimet në Kuvend vijnë në një kohë kur, gjatë ditës së diel, një grup protestuesish u mblodhën para ndërtesës legjislative, duke paralajmëruar se do të qëndrojnë aty gjatë gjithë natës. Përveç pikës së parë, seanca parasheh një mori çështjesh të rëndësishme, ku përfshihet shqyrtimi i parë i Projektligjit nr. 11/L-001 për ndryshimin dhe plotësimin e Ligjit nr. 05/L-053 për Dhomat e Specializuara dhe Zyrën e Prokurorit të Specializuar, si dhe shqyrtimi i Projektligjit nr. 11/L-002 për Ratifikimin e Marrëveshjes së Kredisë ndërmjet Republikës së Kosovës dhe Agjencisë Franceze për Zhvillim për Projektin e Lojërave Mesdhetare XXI në Kosovë. Po ashtu, deputetët do të shqyrtojnë tri projektligje për ratifikimin e marrëveshjeve financiare me Bashkimin Evropian: Projektligjin nr. 11/L-014 për Amendamentin Nr. 1 të Programit IPA 2021, Projektligjin nr. 11/L-015 për Amendamentin Nr. 1 të Programit IPA 2022, dhe Projektligjin nr. 11/L-016 për Programin Shumëvjeçar IPA 2026-2027. Agjenda e seancës parasheh edhe procese të rëndësishme zgjedhore dhe emërimi, duke përfshirë zgjedhjen e dy (2) anëtarëve dhe të Kryesuesit të Bordit të Zyrës së Rregullatorit të Energjisë, zgjedhjen e Auditorit të Përgjithshëm të Republikës së Kosovës, si dhe përzgjedhjen e dy (2) anëtarëve joekzekutivë të Bordit të Bankës Qendrore të Republikës së Kosovës. Paketa e projektligjeve që do të kalojnë në shqyrtim të parë përfshin gjithashtu: Projektligjin nr. 11/L-006 për Byronë Shtetërore për Verifikimin dhe Konfiskimin e Pasurisë së Pajustifikueshme, Projektligjin nr. 11/L-017 për Parandalimin e Pastrimit të Parave dhe Luftimin e Financimit të Terrorizmit, Projektligjin nr. 11/L-007 për rekrutimin, vlerësimin e performancës, kontrollin e integritetit dhe statusin e gjyqtarëve dhe prokurorëve, si dhe projektligjet për Këshillin Prokurorial (nr. 11/L-008) dhe Këshillin Gjyqësor të Kosovës (nr. 11/L-009). Në vijim të seancës do të shqyrtohen edhe Projektligji nr. 11/L-010 për përgjegjësinë disiplinore të gjyqtarëve dhe prokurorëve, Projektligji nr. 11/L-011 për Akademinë e Drejtësisë, Projektligji nr. 11/L-003 për Energjinë, Projektligji nr. 11/L-004 për Energjinë Elektrike, Projektligji nr. 11/L-005 për Inovacion dhe Ndërmarrësi, si dhe Projektligji nr. 11/L-012 për pagesat e vonuara në transaksionet tregtare. Buxheti dhe çështjet e resurseve ujore mbyllin këtë agjenci voluminoze, me shqyrtimin e parë të Projektligjit nr. 11/L-013 për ndryshimin dhe plotësimin e Ligjit nr. 10/L-001 mbi ndarjet buxhetore për Buxhetin e Republikës së Kosovës për vitin 2026, si dhe Projektligjit nr. 11/L-018 për Menaxhimin e Resurseve Ujore.