Buxhetet komunale në alarm: Miliona euro bllokohen përmes përmbaruesve për kontratën kolektive

Zbatimi i kontratës kolektive vazhdon të rëndojë rëndë mbi financat e pushtetit lokal, duke sjellë tërheqjen e miliona eurove nga buxhetet e komunave nëpërmjet vendimeve gjyqësore. Pasojat e kësaj situate po godasin drejtpërdrejt investimet kapitale dhe zbatimin e projekteve thelbësore në shërbim të qytetarëve, ndërkohë që autoritetet komunale ngrenë alarmin për vështirësi të theksuara financiare. Ndër komunat më të prekura është edhe Fushë-Kosova, ku vetëm gjatë vitit 2025 dhe muajve të parë të këtij viti janë hequr nga qarkullimi shuma të konsiderueshme përmes rrugëve gjyqësore. “Gjatë vitit 2025, për kategori të ndryshme, por përsëri te kategoria e investimeve kapitale, janë tërhequr me vendime gjyqësore një shumë prej 1 milion e 957 mijë eurosh, nëpër projekte të ndryshme kapitale. Për vitin 2026, prej janarit deri më sot, me vendime gjyqësore, nga Thesari janë tërhequr 357 mijë e 900 euro. Në mesin e tyre ka edhe projekte kapitale”, ka deklaruar Bardhyl Koiçiçi, drejtor për Buxhet dhe Financa në Fushë-Kosovë. Megjithatë, kjo sfidë nuk e ka kapluar vetëm këtë komunë. Një situatë e ngjashme, madje me përmasa edhe më të mëdha financiare, paraqitet në Lipjan, ku llogaritë e kësaj të fundit janë prekur me mbi 4 milionë e 300 mijë euro. “Kjo çështje paraqet një sfidë për komunat. Detyrimet ndaj kontratave kolektive kanë ndikuar drejtpërdrejt në kapacitetin financiar të komunës dhe, rrjedhimisht, në mundësinë për realizimin e projekteve të reja në shërbim të qytetarëve”, u shpreh Besarta Qadraku, zëdhënëse e Komunës së Lipjanit. Të dhënat nga Asociacioni i Komunave të Kosovës tregojnë se fatura financiare e kontratës kolektive ndër vite ka kapur shifrën e qindra miliona eurove. Drejtori ekzekutiv i këtij asociacioni, Sazan Ibrahimi, thekson se pesha kryesore e këtyre tërheqjeve ka rënë mbi fondet e destinuara për zhvillim dhe investime kapitale. Nëpërmjet përfaqësuesve të tyre, komunat kanë ndërmarrë hapa ligjorë duke iu drejtuar gjykatave me kërkesën që fondet e bllokuara t'i kthehen buxhetit lokal, me qëllim që të rinisë realizimi i projekteve të ndërprera. Për më tepër, drejtuesit komunalë paralajmërojnë se tendenca e tërheqjes së mjeteve nga investimet kapitale rrezikon të vazhdojë edhe përgjatë këtij viti, duke qenë se vendimet e pritshme gjyqësore përfshijnë gjithashtu detyrime që lidhen me sektorët jetikë të arsimit dhe shëndetësisë.