Kurorëzim historik në UFC-332: Natalia Silva mposht Wang Cong dhe merr titullin kampion bote

Skena e arteve marciale mikse (MMA) është zhvendosur këtë fundjavë në Salt Lake City të Shteteve të Bashkuara të Amerikës, ku u organizua eventi i shumëpritur UFC-332. Mbrëmja ka rezervuar emocione të forta për adhuruesit e këtij sporti, teksa në qendër të vëmendjes ka qenë përballja për kurorën e artë në divizionin “flyweight” për femra (pesha deri në 57 kg). Sportistja braziliane Natalia Silva ka shkruar një faqe të re në karrierën e saj, duke u kurorëzuar kampione bote në këtë kategori, e cila ishte vakante. Për të arritur këtë sukses të madh, ajo triumfoi pas një beteje të gjatë dhe të kujdesshme ndaj sfidantes nga Kina, Wang Cong, falë vendimit unanim të gjyqtarëve. Për Silvën kjo fitore përfaqëson një tjetër arritje të jashtëzakonshme, duke çuar bilancin e saj në 21 fitore, 5 humbje dhe 1 barazim, ndërsa Wang Cong pëson humbjen e dytë në karrierë kundrejt 10 fitoreve. Spektakli në kafaz ka zgjatur për pesë raunde të plota, të karakterizuara nga një ritëm i lartë dhe rivalitet i pandërprerë. Të tre gjyqtarët e takimit anuan nga luftëtarja braziliane me rezultatet 49-47, 48-47 dhe 49-46, duke kurorëzuar dominimin e saj në këtë përballje të ekuilibruar, ku shkëmbyen goditje të fuqishme, shkelma dhe aksione teknike. Eventi në Utah ka sjellë gjithashtu surpriza të tjera, ku dy ish-kampionë bote të njohur kanë pësuar disfata të papritura. Deiveson Figuiredo u dorëzua që në raundin e parë, duke u mposhtur me nokaut teknik (KO) nga Payton Talbott. Në një fat të ngjashëm ka rënë edhe veterani Rafael dos Anjos, i cili nuk ka mundur t'i bëjë ballë sulmeve të Alexander Hernandez, duke u mposhtur gjithashtu me nokaut teknik (KO), por kësaj radhe në raundin e dytë të sfidës.