Shevchenko jep mesazhin e fortë për Italinë: Do të ngriheni sërish, mos u ankoni por veproni

Në një rrëfim të hapur për të përditshmen italiane “Gazzetta dello Sport”, legjenda e futbollit Andriy Shevchenko ka ndarë ndjenjat e tij të thella për Milanin dhe vendin fqinj, duke i kushtuar vëmendje edhe situatës aktuale të kombëtares “azzurre”. “Milani mbetet përgjithmonë në zemrën time dhe unë do të jem gjithmonë tifoz i tij. Edhe Italia zë një vend të veçantë shpirtëror, pasi e konsideroj si atdheun tim të dytë. Nuk po e them këtë për t’i bërë qejfin askujt, por sepse kështu i ndjej,” u shpreh ish-sulmuesi i njohur. Duke analizuar ecurinë e përfaqësueses italiane, ai u bëri thirrje tifozëve dhe opinionit publik të tregojnë besim, duke kërkuar përqendrim te potenciali ekzistues. “Mos u ankoni kaq shumë, sepse ju do të dilni nga kjo periudhë negative. Vlerësoni të kaluarën tuaj të lavdishme dhe kujtoni se dispononi një talent të jashtëzakonshëm. Mjafton të bëni disa ndryshime të nevojshme për të nisur një cikl të ri, aq më tepër që keni njerëzit e aftë për ta arritur këtë,” shtoi ai. Shevchenko preku edhe aspektin profesional, duke shpjeguar arsyen e përfshirjes së italianit Andrea Maldera në stafin teknik të Ukrainës. “Ai e njeh shkëlqysisht këtë mjedis, ka fituar përvojë ndërkombëtare duke bashkëpunuar edhe me De Zerbin dhe është një profesionist ambicioz. Pavarësisht sfidave të mëdha, obligimi ynë moral ndaj tifozëve dhe popullit ukrainas mbetet i pandryshuar,” theksoi ish-sulmuesi, i cili konfirmoi gjithashtu objektivin madhor: “Do të bëjmë çmos për të siguruar kualifikimin në një kompeticion të madh ndërkombëtar.” Në prag të 50-vjetorit të lindjes, dëshira e tij më e madhe nuk lidhet me fushat e blerta, por me situatën në vendlindje. “Dëshiroj vetëm paqe. Dua që bashkatdhetarët e meje të kthehen sa më parë në një jetë normale,” tha ai me emocion. Në rrafshin personal dhe sportiv, Shevchenko përfundoi: “Në futboll, misioni im është të ndihmoj brezat e rinj të zhvillohen. Ndërsa në jetën e përditshme, synimi im është të eci përpara së bashku me familjen dhe të jem gjithmonë një prind shembullor.”