Nisma për Gjykatën Speciale, Bedri Hamza: Synohet kufizimi i mandatit dhe jo shuarja e saj

Kryetari i Partisë Demokratike të Kosovës, Bedri Hamza, gjatë mbledhjes së Këshillit Drejtues të këtij subjekti politik, ka dhënë detaje rreth projektligjit për Dhomat e Specializuara, duke theksuar se qëllimi i kësaj nisme është rishikimi i fushëveprimit të kësaj gjykate dhe jo mbyllja e saj. Hamza ka bërë të ditur se ky projektligj parashikon që të gjitha çështjet që nuk kanë lidhje direkte me pretendimet e ngritura në raportin e Dick Martyt të kalojnë në kompetencë të sistemit vendor të drejtësisë në Kosovë, bashkë me dokumentacionin, provat dhe lëndët përkatëse. Gjithashtu, ai ka nënvizuar se propozimi përfshin mundësinë që organizata ndërkombëtare të pavarura dhe profesioniste të monitorojnë standardet e gjykimit të drejtë, kohëzgjatjen e procedurave gjyqësore, kushtet e paraburgimit dhe garantimin e të drejtave të njeriut. Kreu i PDK-së ka sqaruar se ky ndryshim i propozuar nuk do të ndikojë aspak në fazën aktuale të proceseve gjyqësore, të cilat do të vijojnë normalisht deri në shkallën e Apelit. “Tani duhet të veprohet edhe si shtet. Kuvendi duhet ta bëjë pjesën e vet. Qeveria duhet ta bëjë pjesën e vet. Edhe PDK do ta bëjë pjesën e vet”, ka deklaruar ai para strukturave të partisë.