Mbrojtja e vlerave të UÇK-së, PDK kërkon nga Qeveria dërgimin e menjëhershëm të Projektligjit në Kuvend

Partia Demokratike e Kosovës i ka bërë thirrje ekzekutivit që të procedojë pa vonesa në Kuvend Projektligjin për ndryshimin e Ligjit për Dhomat e Specializuara, duke e cilësuar mbrojtjen e luftëtarëve të lirisë si një emergjencë kombëtare. Gjatë punimeve të komisioneve parlamentare, deputetja e kësaj partie, Blerta Deliu Kodra, ka theksuar se Grupi Parlamentar i PDK-së ka insistuar vazhdimisht në këtë drejtim, duke e vlerësuar këtë çështje si prioritetin kryesor mbi të gjitha prioritetet e tjera shtetërore. "Si PDK e kemi dëshmuar me veprime se nuk bëhemi pengesë për funksionalitetin e institucioneve të Republikës së Kosovës. Mirëpo, edhe është krejtësisht e padrejtë që të simulojmë normalitet përballë një çështjeje që kërkon veprim urgjent nga shteti. Për PDK-në Projektligji për ndryshimin e Ligjit për Dhomat e Specializuara në funksion të mbrojtjes së UÇK-së duhet të jetë prioritet mbi prioritete", ka deklaruar ajo. Ligjvënësja e PDK-së ka shprehur hapur pakënaqësinë e saj lidhur me faktin se në seancën e sotme parlamentare janë sjellë për shqyrtim një numër i madh projektligjesh me procedurë të përshpejtuar – ku Qeveria ka shqyrtuar 35 pika të ndryshme – ndërkohë që nisma legjislative për Dhomat e Specializuara vazhdon të jetë e bllokuar në sirtarë pa u trajtuar fare. "Për këtë Projektligj për Dhomat e Specializuara na thuhet që po kërkohet ekspertizë dhe po zvarritet procedimi i tij. Për PDK-në, kjo është e papranueshme. Kuvendi i Kosovës me votë unanime të 99 deputetëve e shprehu vullnetin për mbrojtjen e UÇK-së dhe të çlirimtarëve. Tani ky vullnet duhet të kthehet në veprim konkret", ka shtuar më tej Deliu Kodra. Në përfundim, Partia Demokratike e Kosovës i ka bërë edhe një herë thirrje publike kryeministrit Albin Kurti dhe ministres së Drejtësisë që të ndërmarrin hapat e nevojshëm për ta dërguar këtë projektligj në Kuvend për miratim.