Italisë i mjafton një paraqitje fantastike ndaj Turqisë, Montela refuzon kategorikisht dorëheqjen

Përfaqësuesja e Italisë ka arritur një triumf të bujshëm në udhëtim ndaj Turqisë, duke e mposhtur me rezultatin e thellë 4-1. Kjo përballje ishte e vlefshme për xhiron e dytë të fazës së grupeve në Ligën e Kombeve. Rezultati thellësisht negativ ka shkaktuar zemërim dhe zhgënjim të madh në radhët e tifozërisë vendase. Mbështetësit turq kanë lëshuar vërshëllima drejt skuadrës së tyre në shenjë pakënaqësie, duke kërkuar njëkohësisht largimin e menjëhershëm të stafit teknik, ku barra më e rëndë e përgjegjësisë i takon trajnerit Vinçenzo Montela. Tekniku italian, i cili ka marrë drejtimin e përfaqësueses turke prej tri vitesh, është treguar mjaft i drejtpërdrejtë dhe i ashpër gjatë konferencës për shtyp kur u pyet për reagimin e ashpër të publikut. "Duke parë vlerën e tregut të dy ekipeve, Italia vlen 840 milionë euro, ndërsa ne jemi 417 milionë euro. Megjithatë, para ndeshjes, mediat e bënin sikur do të na priste një ndeshje e lehtë", u shpreh 52-vjeçari. Më tej, ai ka hequr çdo dilemë rreth së ardhmes së tij në krye të stoli turk, duke hedhur poshtë zërat për një largim të mundshëm. "Nuk kam ndërmend të jap dorëheqjen. Unë besoj në punën që po bëj. Edhe kur mora oferta të rëndësishme, nuk u largova. Unë vazhdoj të kem besim te lojtarët e mi. Nëse do të kishte ndonjëherë një situatë të lidhur me dorëheqjen, do ta diskutoja me lojtarët e mi, por nuk është në tavolinë sot", u shpreh trajneri Montela. Në fund të prononcimit të tij, ai ka kujtuar rrugëtimin dhe progresin e bërë me këtë kombëtare ndër vite. "Ky ekip ishte në Ligën C tre vjet më parë. Pastaj së bashku fituam Ligën B, dhe sot jemi në Ligën A. Është normale që në këtë nivel ndryshimet të jenë më të mëdha dhe që niveli i konkurrencës të jetë i ndryshëm", përfundoi ai.