Bayern Mюнhen synon sulmuesin e Juventusit si pasardhës të Harry Kane

Mediat britanike dhe ato gjermane raportojnë se gjiganti bavarez ka vënë në shënjestër sulmuesin e Juventusit, i cili shihet si zëvendësuesi ideal për Harry Kane në të ardhmen. Sulmuesi gjerman u transferua te skuadra e drejtuar nga trajneri Luciano Spalletti në çastet e fundit të merkatos verore, por aventura e tij në Torino mund të ketë jetë të shkurtër. Deri më tani, Nick Woltemade nuk ka arritur të integrohet plotësisht te bardhezinjtë, duke regjistruar vetëm tri paraqitje në kampionat dhe një ndeshje si titullar në triumfin 5-0 në Europa League kundër NEC, për shkak të mungesës së formës optimale fizike. Megjithatë, zërat për një largim të mundshëm nga Italia kanë nisur të qarkullojnë që tani. Lojtari iu bashkua “Zonjës së Vjetër” në formë huazimi të pastër për shifrën e 5 milionë eurove, ndërsa përfiton një pagë prej 4.4 milionë eurosh në sezon. Marrëveshja me klubin anglez nuk përfshin asnjë opsion blerjeje, megjithëse kartoni i tij vlerësohet rreth 60 milionë euro. Vlen të theksohet se Newcastle e transferoi atë nga Stuttgart në gusht të vitit 2025 për 75 milionë euro. Interesimi i Bayern Munchen për Woltemade është konfirmuar nga burime të ndryshme ndërkombëtare, me klubin gjerman që e planifikon atë për edicionin e ardhshëm. Edhe pse ende nuk ka pasur kontakte zyrtare apo direkte mes drejtuesve bavarezë, agjentëve të lojtarit dhe Newcastle, interesimi mbetet konkret, pasi gjermanët e shohin atë si trashëgimtarin e duhur të Harry Kane. “Kur erdhi nuk ishte shumë i stërvitur, tani duhet të kapë formën. Duhet të luajë që të kuptojmë se ku duhet të qëndrojë, atje përpara, apo përreth zonës”, ka deklaruar trajneri Spalletti lidhur me situatën e sulmuesit. Edhe pse stafi teknik po pret versionin më të mirë të Woltemade, e ardhmja e tij mbetet e pasigurt dhe gjasat janë të pakta që ai të qëndrojë gjatë në Torino, pavarësisht ecurisë së tij gjatë këtij sezoni.