Magjia e Fermin Lopez vulos suksesin e Barcelonës në Madrid dhe konsolidon kreun e La Ligës

Barcelona ka arkëtuar tri pikë me peshë të madhe nga udhëtimi i vështirë në kryeqytet, pasi ka mposhtur Atletico Madridin me rezultatin 1-2 në kuadër të javës së 12-të në elitën e futbollit spanjoll. Pjesa e parë nisi më mirë për vendasit, të cilët arritën të zhbllokonin shifrat në minutën e 10-të, kur Giuliano Simeone dërgoj topin në rrjetë pas një asistimi të dërguar nga Julian Alvarez. Gjithsesi, katalunasit reaguan para se skuadrat të hynin në dhomat e zhveshjes, duke barazuar rezultatin në 1-1 përmes Fermin Lopez në minutën e fundit të fraksionit të parë. Në pjesën e dytë, talenti Fermin u shndërrua në protagonistin absolut të sfidës, duke kompletuar përmbysjen e madhe në minutën e 66-të. Ai realizoi golin e tij të dytë personal pas një asistimi fantastik nga Lamine Yamal. Megjithëse deri në fërshëllimën e fundit pati raste shënimi për të dyja anët, rezultati mbeti i pandryshuar, duke i dhënë Barcelonës një fitore tejet të rëndësishme në një nga stadiumet më të ndërlikuara të kampionatit. Pas këtij triumfi, katalunasit kryesojnë renditjen tabelore me 33 pikë të grumbulluara, duke krijuar një distancë prej tri pikësh nga Real Madridi që mban vendin e dytë, ndërsa Atletico mbetet në kuotën e 28 pikëve pas kësaj humbjeje.