Pakënaqësi në Shkodër: Drejtori i Vllaznisë lëshon akuza të forta ndaj trajnerëve të Kombëtareve

Publikimi i listave zyrtare të ekipeve kombëtare të moshave për sfidat kualifikuese të Kampionatit Evropian për grupmoshat U17 dhe U19 ka shkaktuar një reagim të ashpër nga drejtori sportiv i Vllaznisë, Alban Hasani. Duke qenë se deri para pak javësh ka mbajtur detyrën e përgjegjësit të akademisë kuqeblu, Hasani gëzon një njohje të hollësishme të realitetit dhe talentit në futbollin e fëmijëve dhe të rinjve në vend. Për këtë arsye, ai ka drejtuar akuza të rënda ndaj trajnerit të Kombëtares U17, Armanda Dama, dhe atij të Kombëtares U19, Fatjon Tafaj, duke pretenduar se ata po shpërfillin mundin e lojtarëve dhe nuk po thërrasin elementët më cilësorë, siç është rasti i talentëve shkodranë. Nëpërmjet disa komenteve publike, të cilat tashmë janë fshirë nga faqja zyrtare e Federatës Shqiptare të Futbollit, Hasani ka vënë në shënjestër teknikun e U17-ës për mosfshirjen e futbollistëve nga ekipi kampion. “Po si s’keni turp që talleni me djersën e sportistëve? Vllaznia kampion Shqipërie me 5 sportistë lojtarë të vitit. Shpuza portieri i vitit, Gjeka sulmuesi i vitit, Gjoni mbrojtësi i vitit, Marku golashënuesi më i mirë i kampionatit me 28 gola si dhe Sukaj e Kopliku”, shkruante ndër të tjera ai. Kritikat e drejtorit sportiv nuk u ndalën me kaq, pasi ai vijoi me pakënaqësitë e tij edhe për përzgjedhjet te kombëtarja U19 që drejtohet nga Tafaj. “Me çfarë kompetencash nuk grumbullohet Uldedaj mor shoku mësues? Luan në Superligë, shënon gol, sportist i datëlindjes 2009”, ka qenë reagimi i tij.