Afrimi i parë në kampin e Kosovës, Enis Rexhepi: Zgjedhja erdhi nga zemra, jam gati për këtë sfidë

Talenti i skuadrës gjermane Stuttgart U19, Enis Rexhepi, është bashkuar zyrtarisht me Përfaqësuesen e Kosovës, duke shënuar kështu thirrjen e tij të parë në fanellën e 'Dardanëve'. Sulmuesi i ri ka tërhequr vëmendjen e selektorit Franco Foda, i cili e ka përfshirë atë në listën e futbollistëve për sfidat e planifikuara gjatë muajit nëntor. Duke folur për këtë hap të rëndësishëm në karrierën e tij, Rexhepi theksoi se vendimi për të përfaqësuar Kosovën ka qenë tejet i natyrshëm dhe i mirëpeshuar. “Ka qenë shumë lehtë me vendos për Kosovën, se kam vendosur me zemër”, deklaroi fillimisht sulmuesi i ri. Ai gjithashtu veçoi ambientin pozitiv dhe ambiciet e projektit si faktorë kyç në vendimin e tij, duke shtuar se tashmë ka njohje të mëparshme me disa nga lojtarët. “Kam shokë këtu që luajnë në Bundesliga në Gjermani, projekti po më pëlqen këtu. Kosova ka shumë lojtarë të mirë, dhe unë do jap maksimumin”, përfundoi ai. Në kuadër të angazhimeve të këtij muaji, Përfaqësuesja e Kosovës do të zhvillojë ndeshjet e radhës kundër përfaqësueseve të Izraelit dhe Irlandës.