Thirrja e Gëzim Mekulit: Kosova ka nevojë për President, kompromisi është domosdoshmëri shtetërore

Gazetari Gëzim Mekuli u ka bërë thirrje forcave politike në Kuvendin e Kosovës që të tejkalojnë ngërçin aktual dhe të arrijnë një marrëveshje për zgjedhjen e Presidentit të ri. Sipas tij, kjo çështje tejkalon interesat ngushta partiake dhe është jetike për funksionimin e shtetit në një kohë kur gjeopolitika ndërkombëtare po përballet me sfida të paparashikueshme. Mekuli ka kërkuar nga deputetët që të lënë mënjanë inatet personale dhe emocionet, duke theksuar se institucionet e Kosovës kanë nevojë për unitet dhe maturi. Ai ka argumentuar se mbrojtja e vlerave të luftës së UÇK-së dhe proceseve gjyqësore në Hagë kalon përmes stabilitetit institucional, prandaj zgjedhja e kreut të shtetit duhet të jetë prioriteti kryesor. Duke sjellë si shembull historik Norvegjinë e vitit 1905, e cila për hir të interesit kombëtar zgjodhi një princ danez për mbret, Mekuli ka inkurajuar liderët kosovarë që të gjejnë zgjidhje kreative, qoftë edhe përmes kompromiseve të vështira. "Kosovës i duhet një President; edhe prej lloqi, nëse e kërkon nevoja", ka deklaruar ai, duke shtuar se nëse mungon konsensusi për një figurë vendore, duhet shqyrtuar edhe mundësia e një zgjidhjeje të huazuar, ngjashëm me modelin norvegjez. Në mesazhin e tij, gazetari ka kërkuar që partitë të ulen në bisedime dhe të mos lejojnë që egoja partiake të dominojë mbi fatin e shtetit. Ai ka theksuar se përballë sfidave të mëdha, Kosova duhet të vendosë interesin e qytetarëve mbi gjithçka tjetër, duke mos u dhënë hapësirë agjendave që dëmtojnë unitetin e Republikës. Në përfundim, Mekuli ka apeluar për një qasje serioze dhe konstruktive nga klasa politike, duke nënvizuar se uniteti është arma më e fortë për të ruajtur pavarësinë dhe për të mos u dhënë kënaqësi kundërshtarëve të shtetit të Kosovës.