Taravari thirrje koalicionit VLEN: Bashkë për fitoren e Arkin Jahijit në Bërvenicë

Kryetari i Aleancës për Shqiptarët, Arben Taravari, u ka drejtuar një apel publik partnerëve të koalicionit VLEN, duke u kërkuar atyre mbështetje për kandidatin e Aleancës Kombëtare për Integrim (AKI), Arkin Jahiji, në garën e raundit të dytë për komunën e Bërvenicës. Në një paraqitje televizive, Taravari shprehu gatishmërinë e subjektit të tij për t’u angazhuar maksimalisht në këtë përpjekje. Ai propozoi që në fazën finale të zgjedhjeve të shmangen dallimet partiake dhe materialet propagandistike të ndara, me synimin e vetëm për të siguruar fitoren e një kandidati me përvojë të dëshmuar institucionale. “E ftoj publikisht VLEN-in që të bashkohemi. Ne jemi të gatshëm t’i heqim banderolat tona dhe të angazhohemi me të njëjtin përkushtim siç bëmë vitin e kaluar për Haqim Ramadanin. Synimi ynë është që të gjithë të fokusohemi te mbështetja e Arkin Jahijit, në mënyrë që Bërvenica të drejtohet nga një profesionist”, deklaroi Taravari. Krahas këtyre zhvillimeve, kreu i ASH-së konfirmoi edhe një takim të zhvilluar së fundmi me kryetarin e BDI-së, Ali Ahmeti. Sipas tij, bëhej fjalë për një takim të kryesive të ngushta të të dyja partive, ku u diskutuan detajet teknike dhe koordinimi i aktiviteteve për procesin zgjedhor në Bërvenicë, duke e cilësuar këtë bisedë si mjaft konstruktive. Në përfundim, Taravari vlerësoi lart ecurinë e kandidatëve të Aleancës Kombëtare për Integrim, duke theksuar se rezultatet e arritura në zgjedhjet e 11 janarit në Gostivar dhe Vrapçisht janë një dëshmi e suksesit të këtij subjekti politik në ciklin zgjedhor të vitit 2026.