Kur duhet të alarmoheni nga prizat e nxehta? Këshillat e ekspertit për rreziqet në shtëpi

Ndonëse një prizë e ngrohtë nuk përfaqëson domosdoshmërisht një rrezik imediat, ajo nuk duhet anashkaluar në asnjë mënyrë. Elektricisti Steve Clemente ka ndarë detaje për revistën 'Real Simple' rreth sinjaleve paralajmëruese që kërkojnë vëmendje dhe momentit të duhur për të kërkuar ndihmën e një profesionisti. Është normale që prizat të nxehen lehtësisht gjatë punës së zakonshme, siç është rasti i karikimit të telefonit apo përdorimit të pajisjeve me konsum të lartë energjie. Megjithatë, eksperti thekson se duhet bërë kujdes i shtuar nëse priza vazhdon të jetë e ngrohtë edhe pasi pajisjet janë shkëputur plotësisht. Përveç temperaturës së lartë pa pasur asnjë pajisje të lidhur, tregues të tjerë të qartë se pas mureve fshihet një problem shqetësues përfshijnë zhurmat e gumëzhitjes, njollat e verdha apo ndryshimet e ngjyrës rreth saj, prania e shkëndijave dhe era e pazakontë e djegies. Origjina e këtij fenomeni mund të lidhet me një karikues defektoz ose me ngarkesën e tepërt të pajisjeve në të njëjtën prizë apo qark. Nga ana tjetër, shkaqet më alarmante përfshijnë dëmtimet në instalimet elektrike, pajisjet e prishura apo një sistem që nuk i përgjigjet kërkesave aktuale të familjes. Clemente tërheq vëmendjen sidomos për pronarët e banesave të vjetra, ku rrjeti elektrik nuk është projektuar për t'i bërë ballë teknologjisë moderne. Në raste të tilla, hapi i parë është shkëputja e menjëhershme e të gjitha pajisjeve nga ajo prizë dhe lënia e tyre që të ftohen. Nëse përdorni kabllo zgjatuese apo priza ndihmëse, këshillohet zvogëlimi i numrit të pajisjeve të inkuadruara në to. Nëse priza vijon të jetë e nxehtë ose konstatohet ndonjë prej shenjave të lartpërmendura, duhet të kontaktohet pa vonesë një elektricist i licencuar, duke shmangur çdo tentativë për riparim personal. Neglizhimi i këtyre defekteve elektrike mund të ketë pasoja fatale dhe të shkaktojë zjarr në banesë.