Juventus bën sqarimin zyrtar: Zhegrova nuk mund të zëvendësojë Locatellin, rregullat e UEFA-s favorizojnë Ekhator

Drejtori ekzekutiv i Juventusit, Giovanni Carnevali, ka dhënë detaje të rëndësishme gjatë mbledhjes së aksionarëve të klubit, duke sqaruar se sulmuesi Edon Zhegrova nuk ka të drejtë të zëvendësojë Manuel Locatellin në listën e UEFA-s, për shkak të kritereve strikte rregullatore të shtëpisë evropiane të futbollit. “Locatelli është futbollist i formuar në Itali dhe mund të zëvendësohet vetëm nga një lojtar i formuar në Itali. Pra, Ekhator dhe jo Zhegrova”, ka deklaruar Carnevali para aksionarëve. Statistikat dhe raportet mjekësore tregojnë se Locatelli do të mbetet jashtë fushave të blerta deri në muajin mars për shkak të një dëmtimi, ndërkohë që Zhegrova nuk figuronte fare në listën fillestare të Biankonerëve për garat evropiane në fillim të edicionit. Nga ana tjetër, as Jeff Ekhator nuk ishte përfshirë fillimisht në listë, pasi ai po kalonte një periudhë dëmtimi në momentin kur klubi dorëzoi dokumentacionin zyrtar në UEFA. Talenti i ri i lindur në vitin 2006, i cili u transferua te Juventusi nga rradhët e Genoas gjatë merkatos së verës, tashmë është rikuperuar plotësisht dhe është vënë në dispozicion të trajnerit për ndeshjet e kampionatit. Ai madje ishte pjesë e grupit në sfidën e së dielës, ku Juventusi triumfoi me rezultatin 2:0 ndaj Napolit në stadiumin “Allianz”.