Vizita në burgun e Fierit, ministri Gogu hedh poshtë aludimet për takimin me Veliajn dhe zbardh bisedën

Ministri i Drejtësisë, Toni Gogu, ka përgënjeshtruar kategorikisht zërat dhe spekulimet në lidhje me një takim të zhvilluar në ambientet e paraburgimit të Fierit me kryebashkiakun e pezulluar të Tiranës, Erion Veliaj, duke mohuar çdo pretendim se i ka kërkuar dorëheqjen nga mandati me udhëzim të kryeministrit Edi Rama. Nëpërmjet një reagimi publik, Gogu ka konfirmuar se e ka takuar Veliajn të premten e kaluar, por ka saktësuar se fokusi i vetëm i kësaj vizite ka qenë verifikimi nga afër i kushteve të paraburgimit, procesi i transferimit të tij nga burgu i Durrësit në atë të Fierit, si dhe shqyrtimi i pretendimeve të ngritura më parë në publik nga mbrojtësi i tij ligjor. “Më vjen thellësisht keq për të pavërtetat që janë publikuar sot lidhur me vizitën time në IEVP Fier. Po, e kam takuar Erion Veliajn të premten. Në ushtrim të përgjegjësive të mia si Ministër i Drejtësisë, kam shkuar për t’u njohur me kushtet e trajtimit të tij dhe për të dëgjuar ankesat e shprehura publikisht nga avokati i tij”, shkruan ndër të tjera ministri. Gogu ka vënë inatin e tij në dukje ndaj fabrikimit të lajmeve të rreme, duke përmendur lidhjen e vjetër miqësore me kryebashkiakun, por duke bërë të qartë se përmbajtja e shpërndarë nuk ka asnjë lidhje me realitetin e bisedës së tyre zyrtare. “Me Erionin më lidh një miqësi shumë e hershme, të cilën e dinë të gjithë. Por dua të jem krejt i qartë: Nuk i gjej dot arsyet pse janë stisur ato të pavërteta dhe nuk dua ta besoj që i ka thënë apo shkruar Erioni. Kush më njeh e di se nuk ka asnjë shans, në këtë botë apo në tjetrën, që unë të shqiptoj “mesazhet” që më janë vënë në gojë. Jam vërtet i befasuar”, vijon ai. Në përmbyllje të reagimit të tij, zyrtari i lartë i qeverisë ka theksuar se lëvizja e tij ka qenë një përgjigje institucionale ndaj tensioneve dhe paqartësive të krijuara në media rreth të drejtave dhe lirive të personave nën hetim, duke shtuar se gjithçka mbetet e provueshme përmes dokumentacionit zyrtar. “Kam shkuar për të dëgjuar shqetësimet e një njeriu pas një tymnaje mediatike dhe shqetësimeve të kuptueshme të kujtdo që shqetësohet kur flitet për liri e të drejta. Rrethanat e vizitës janë të dokumentuara dhe të verifikueshme. Për të tjerat, koha dhe e vërteta ecin dorë për dore”, përfshirë në shkrimin e tij ministri Gogu.