Drama në alpet austriake: Alpinisti i ri braktiset nga shokët në 2600 metra lartësi, shpëtohet pas 14 orësh

Një operacion dramatik shpëtimi është finalizuar me sukses në alpet austriake gjatë fundjavës, ku një alpinist gjerman është nxjerrë i gjallë pasi ishte lënë i vetëm në kushte ekstreme nga dy shoqëruesit e tij. I riu 20-vjeçar u lokalizua në një lartësi prej rreth 2 mijë e 600 metrash mbi nivelin e detit, pas një aksioni rraskapitës prej 14 orësh, siç bëri të ditur Shërbimi austriak i Shpëtimit Malor. Sipas njoftimit zyrtar, tre shtetas gjermanë ishin nisur pasditen e së shtunës për në masivin malor Hochkönig, duke shpërfillur plotësisht parashikimet meteorologjike për mot të keq. “Në lartësinë rreth 2 600 metra, njëri nga tre gjermanët nuk mundi të vazhdonte më tej dhe, rreth orës 19:00, bëri një thirrje urgjence. Megjithatë, shoqëruesit e tij vazhduan ngjitjen dhe, po atë natë, arritën në strehimoren 'Matrashaus' (2.941 m), e cila ishte tashmë e mbyllur”, thuhet në deklaratë. Për shkak të motit të papërshtatshëm, helikopterët e shpëtimit e patën të pamundur të ngriheshin në ajër, duke e bërë situatën edhe më kritike për ekipet në terren. Wolfgang Haggenmüller, kreu i operacioneve dhe drejtuesi lokal i ekipit të Mühlbach, shpjegoi se i riu u sigurua me litar për të kryer zbritjen përmes dëborës së dendur, ku rreziku i rrëzimit ishte tejet i lartë. “Situata ishte kërcënuese për jetën e të gjithëve. Mes reshjeve të dendura të dëborës dhe shikueshmërisë së dobët, ekipi ynë arriti në Erichhütte vetëm në orën 08:18 të mëngjesit”, u shpreh ai. Ndërkohë, Gerhard Kremser, drejtuesi i Shërbimit të Shpëtimit Malor për distriktin e Pongau, theksoi se duke pasur parasysh rrethanat, djaloshi vështirë se do t'ia kishte dalë mbanë të mbijetonte edhe një natë të dytë në male. “Ky operacion tregon edhe një herë se sa shpejt vetëbesimi i tepruar, shpërfillja e paralajmërimeve dhe planifikimi i dobët i itinerarit mund të çojnë në një situatë që rrezikon jetën. Alpinizmi nënkupton gjithashtu të dish të kthehesh mbrapsht në kohën e duhur”, tha ai. Autoritetet policore në Austri kanë nisur tashmë hetimet zyrtare për të zbardhur rrethanat e plota të ngjarjes.