Moti ekstrem godet Italinë dhe Greqinë: Situata më alarmante regjistrohet në ishullin e Rodosit

Vala e motit të keq, e shoqëruar me reshje intensive shiu dhe stuhi të dhunshme, ka përfshirë rajone të gjera të Italisë dhe Greqisë, duke sjellë përmbytje, dëme të mëdha materiale dhe bllokim të qarkullimit rrugor. Ndërsa autoritetet italiane kanë ngritur nivelin e gatishmërisë për shkak të rrezikut të lartë, vatran e situatës më kritike e mban ishulli grek i Rodosit. Gjatë natës, kushtet ekstreme atmosferike goditën me forcë ishullin e Rodosit, ku epiqendra e dëmeve u shënua në Arkangjelos. Si pasojë e reshjeve, një lumë doli nga shtrati duke i shndërruar akset rrugore në përrenj të fuqishëm. Rryma e ujit mori para automjete, ndërkohë që vërshimet depërtuan në dhjetëra banesa, dyqane dhe biznese, duke lënë pas dëme të konsiderueshme materiale. Për arsye sigurie, autoritetet vendosën mbylljen e institucioneve arsimore në disa njësi bashkiake të Rodosit. Njëkohësisht, shqetësime dhe vështirësi në qarkullim u raportuan edhe në zonën e Afantou dhe pjesë të tjera të ishullit. Në krahun tjetër, Italia po përballet gjithashtu me një përkeqësim të theksuar të situatës meteorologjike. Departamenti i Mbrojtjes Civile ka ngritur alarmin e nivelit portokalli në rajonet e Pulias dhe Bazilikatës, ndërsa alarmi i verdhë është vënë në fuqi për Kalabrinë, Kampanian, Molisen, Abruzon dhe Siçilinë. Parashikimet e autoriteteve italiane tregojnë se një sistem i presionit të ulët atmosferik, i cili po zhvendoset nga Ballkani drejt Detit Tirren, do të shoqërohet me reshje të dendura, shtrëngata, breshër dhe erëra të fuqishme. Rreziku kryesor mbetet ai i përmbytjeve urbane, daljes së lumenjve nga shtretërit e tyre dhe aktivizimit të rrëshqitjeve të tokës. Në këtë kuadër, disa qytete kanë ndërmarrë masa preventive, duke vendosur mbylljen e shkollave, parqeve publike dhe zonave të tjera me fluks të lartë njerëzish. Organet kompetente u kanë bërë thirrje qytetarëve që të kufizojnë lëvizjet e paarsyeshme dhe të bëjnë kujdes maksimal pranë rrjedhave ujore dhe përrenjve.