Buxheti i Kosovës për 2027 arrin në 4.27 miliardë euro, zbulohet shifra për Drejtësinë

Ministrja e Drejtësisë, Donika Gërvalla, ka njoftuar opinionin publik se projektbuxheti i Republikës së Kosovës për vitin 2027 do të kapë vlerën e 4.27 miliardë eurove. Përmes një publikimi në rrjetet sociale, ajo ka bërë të me dije se nga kjo shifër e përgjithshme financiare, plot 52.3 milionë euro i janë alokuar dikasterit që ajo drejton, përkatësisht Ministrisë së Drejtësisë. Gërvalla ka përcjellë edhe një mesazh urimi, duke shprehur besimin se këto fonde do të shkojnë në funksion të përmbushjes së projekteve dhe nismave që u shërbejnë drejtpërdrejt qytetarëve dhe vendit. “4.27 miliardë euro është buxheti i Republikës së Kosovës për vitin 2027, prej të cilave 52.3 milionë euro për Ministrinë e Drejtësisë. Na priftë e mbara në realizimin e punëve të mira, në shërbim të qytetarëve dhe të Republikës së Kosovës”, ka shkruar ajo.