Valë e re rritjeje: Maqedonia e Veriut zgjohet me çmime më të larta të karburanteve

Komisioni Rregullator i Energjetikës, i Shërbimeve të Ujit dhe i Shërbimeve të Menaxhimit me Mbeturina Komunale të Republikës së Maqedonisë së Veriut (KRRE) ka miratuar një vendim të ri, i cili sjell shtrenjtim të derivateve të naftës me një mesatare prej 1,55 % krahasuar me tarifën e datës 26.10.2026. Sipas vendimit të ri, lëndët djegëse EUROSUPER BS-95 dhe EUROSUPER BS-98 do të kushtojnë 2,00 denarë më shtrenjtë për litër. Ndërkohë, çmimi i EURODIZELIT (D-Е V) shënon një rritje prej 1,00 denarë për litër. Për sa i përket Vajit Ekstra të Lehtë për Amvisëri (ЕL-1), çmimi i shitjes me pakicë mbetet i pandryshuar. Nga ana tjetër, mazuti М-1 SU do të tregtohet me një shtrenjtim prej 1,300 denarë për kilogram, duke arritur vlerën e re prej 55,573 denarë/kg. Ndryshimet e reja do të hyjnë në fuqi duke filluar nga data 3.11.2026, në orën 00:01, kohë kur do të nisë aplikimi i tavanit të ri të çmimeve për të gjitha derivatet e naftës në treg. Pas hyrjes në fuqi të këtij vendimi, çmimet maksimale të shitjes do të jenë si vijon: EUROSUPER BS - 95 do të kushtojë 93,00 denarë për litër, ndërsa EUROSUPER BS - 98 do të shitet për 95,00 denarë për litër. Automjetet që përdorin EURODIZEL BS (D-E V) do të furnizohen me çmimin e ri prej 100,00 denarë për litër. Vaji për Djegie Ekstra i Lehtë 1 (EL-1) do të tregtohet për 110,00 denarë për litër, kurse mazuti М-1 SU do të ketë çmimin përfundimtar prej 55,573 denarë për kilogram.