Lëvizje e bujshme te Trepça ’89, kapiteni legjendar Shpëtim Idrizi merr sërish drejtimin e skuadrës

Pas një angazhimi në krye të ekipit të KFF Mitrovica, ish-kapiteni ikonik i Trepçës ’89, Shpëtim Idrizi, ka bërë një rikthim zyrtar në bankinën e klubit mitrovicas si trajner kryesor. Idrizi do të marrë frenat e skuadrës me një mision të qartë dhe madhor: sigurimin e promovimit dhe rikthimin e menjëhershëm të klubit në elitën e futbollit kosovar, Superligën e Kosovës. Nëpërmjet një deklarate zyrtare, klubi ka përcjellë emocione dhe optimizëm për këtë bashkëpunim të ri, duke theksuar lidhjen e fortë mes trajnerit dhe ngjyrave të skuadrës: “Disa histori nuk përfundojnë kurrë, ato thjesht vazhdojnë të shkruhen!” – thuhet në hyrje të njoftimit. Më tej, drejtuesit e klubit kanë vlerësuar kontributin e deritanishëm të Idrizit: “Nga fusha e blertë si futbollist, te vija anësore si trajner, Shpëtim Idrizi ka qenë pjesë e historisë dhe identitetit të klubit tonë. Sot, kjo histori vazhdon me një kapitull të ri!” “Me kënaqësi njoftojmë rikthimin e Shpëtim Idrizit në krye të shtabit teknik të KF Trepça’89, duke marrë drejtimin e skuadrës si kryetrajner. Një emër i njohur për familjen tonë, që rikthehet aty ku ka lënë gjurmë, me përkushtimin, përvojën dhe ambicien për të arritur objektivin tonë të përbashkët, rikthimin e KF Trepça’89 në Superligën e Kosovës”, përfundon njoftimi i lëshuar nga klubi mitrovicas.