Trazirat në Tiranë: Arrestohet shtetasi amerikan, dyshohet se hodhi molotov gjatë protestës

Policia e Tiranës ka vënë në pranga gjashtë persona në lidhje me aktet e dhunës të regjistruara gjatë protestës së zhvilluar të shtunën në kryeqytet, mes të cilëve figura e një shtetasi amerikan ka tërhequr vëmendjen e autoriteteve. Bëhet fjalë për Kevin Radosevich, me origjinë sllave dhe banues në Kaliforni, i cili është ndaluar pasi dyshohet se është përfshirë në skena dhune. Ai është fotografuar në momentin kur dyshohet se ka shpërndarë kokteje molotov në drejtim të turmës. Ky ndalim shënon rastin e dytë brenda dhjetë ditëve të fundit që një shtetas amerikan bie në prangat e policisë shqiptare në rrethana të ngjashme. Sipas njoftimit zyrtar të Drejtorisë Vendore të Policisë Tiranë, gjatë tubimit protestuesit kanë ushtruar dhunë ndaj forcave të rendit, duke i kundërshtuar dhe goditur me mjete të forta, lëndë piroteknike, bomba molotov, si dhe me sfera e vida metalike. Përveç gjashtë të arrestuarve, autoritetet policore kanë nisur procedimet penale në gjendje të lirë për tre persona të tjerë, ndërkohë që dy të tjerë janë shpallur në kërkim dhe vijojnë kërkimet për kapjen e tyre.