Nderim për Zahir Pajazitin në ditëlindjen e tij, Haxhiu: Frymëzim i lirisë dhe themelues i UÇK-së

Kryetarja e Kuvendit të Kosovës, Albulena Haxhiu, ka përkujtuar me rastin e ditëlindjes heroin e kombit, Zahir Pajaziti, duke evokuar rolin e tij vendimtar në ngritjen e rezistencës së armatosur dhe në aktet e para të luftës çlirimtare. Në mesazhin e saj, Haxhiu vuri në dukje se Pajaziti ia fali jetën idealit të lirisë që në rini, duke përshkuar shpesh kufirin ilegalisht për të stërvitur e rekrutuar luftëtarë të rinj për kauzën e përbashkët. Ajo shtoi se goditjet e para kundër aparatit policor serb, të udhëhequra nga Pajaziti dhe bashkëluftëtarët e tij, sollën rreze shprese për popullsinë e shtypur në një periudhë kur dhuna dhe terrori shtetëror ishin përditshmëri në vatrat shqiptare. “Sot është ditëlindja e heroit Zahir Pajaziti, pararendësit të luftës çlirimtare dhe njërit prej themeluesve të Ushtrisë Çlirimtare të Kosovës. Zahiri qysh herët e lidhi fatin e tij me lirinë e Kosovës. Ai kaloi shumë herë kufirin për të organizuar dhe përgatitur luftëtarë të rinj dhe, bashkë me shokët e tij, ndërmori aksionet e para çlirimtare kundër forcave policore serbe dhe atyre që e mbanin popullin nën frikë e shtypje të vazhdueshme. Në ato vite, kur policia serbe hynte nëpër shtëpitë shqiptare, rrihte e burgoste njerëz pa i dhënë llogari askujt, secili aksion i tyre i jepte popullit shpresë se zullumi dhe dhuna nuk do të mbeteshin pa përgjigje. Me guximin dhe vendosmërinë e tij, Zahiri e fitoi emrin që ia dha vetë populli “Pushka e parë e lirisë””, ka përfunduar Haxhiu.