Prishtina përgatitet për dy tubime protestuese: Kërkohet largimi i Kurtit dhe drejtësi për Arlinda Zekajn

Kryeqyteti do të jetë nesër skenë e dy zhvillimeve të ndryshme protestuese. Fillimisht, në orën 12:00 të mesditës, është paralajmëruar një protestë kundër kryeministrit Albin Kurti. Organizatori i kësaj iniciative, Durim Aliu, ka bërë të ditur se protestuesit do të kërkojnë dorëheqjen e kreut të ekzekutivit, duke e akuzuar atë për keqmenaxhim të vendit. Ndërkohë, në orën 17:00, qytetarët do të mblidhen për të pestën ditë me radhë në një marsh protestues për të kërkuar drejtësi rreth rastit tragjik të Arlinda Zekajt. Kjo protestë vjen në prag të plotësimit të një jave nga vrasja e Zekaj, e cila u privua nga jeta me sëpatë nga ish-kunati i saj, ngjarje kjo gjatë së cilës autoritetet e rendit në Pejë kishin njohuri paraprake për konfliktet dhe dhunën e vazhdueshme në atë familje. Organizatorët e kësaj proteste ia hedhin fajin institucioneve shtetërore për dështim në mbrojtjen e viktimës. Ata po kërkojnë gjithashtu dorëheqjen e ministres Donika Gërvalla dhe atij të Punëve të Brendshme, Xhelal Sveçla, pas masave të suspendimit që u morën ndaj zinxhirit komandues të përfshirë në këtë rast në Drejtorinë Rajonale të Policisë në Pejë dhe në Prokurorinë Themelore të Pejës.