Vrasja e Arlinda Zekajt: Protestat vijojnë edhe në ditën e shtatë për të kërkuar drejtësi dhe llogaridhënie institucionale

Edhe dita e diel pritet të shënohet me tubime protestuese, teksa qytetarët dhe aktivistët do të kërkojnë drejtësi dhe përgjegjësi nga institucionet pas tragjedisë ku u vra Arlinda Zekaj. Kolektivi për Mendim dhe Veprim Feminist ka njoftuar se protesta e radhës do të mbahet në sheshin “Zahir Pajaziti” në kryeqytet, duke nisur nga ora 17:00. Kjo do të shënojë ditën e pestë radhazi të protestave publike. Tubimi i së dielës përkon edhe me përvymin e një jave nga vrasja e 49-vjeçares, e cila dyshohet se u privua nga jeta nga ish-kunati i saj. “Të dielën shihemi prapë te sheshi Zahir Pajaziti në ora 17:00. Nesër bëhen shtatë ditë nga dita kur Arlinda Zekaj u vra e pesë ditë që ne jemi në rrugë duke kërkuar drejtësi për të e për çdo grua të vrarë. Pesë ditë që me ngulm kërkojmë siguri dhe liri për çdo grua të gjallë. Kërkesat tona janë të qarta, por shteti vazhdon të refuzojë të na dëgjojë. Ne nuk zmbrapsemi dhe çdo ditë që çel do të na gjejë në sheshe e përballë institucioneve që e dështuan Arlindën e po vazhdojnë ta dështojnë çdo grua në Kosovë. Këtë të diel mos rrini në shtëpi, dilni e bashkohuni në protestë. Le ta çojmë amanetin e Arlindës në vend”, thuhet në thirrjen e publikuar nga Kolektivi për këtë organizim.