Nivokazi shpëton Sionin me gol, ndërsa Hajrizi bëhet protagonist edhe me autogol në Zvicër

Futbollistët kosovarë kanë lënë gjurmë të rëndësishme në ndeshjen e vlefshme për javën e 12-të të elitës së futbollit zviceran, ku Luzerni dhe Sioni ndanë pikët pas barazimit 1:1. Skena e ndeshjes u shënua nga paraqitja e Rilind Nivokazit, i cili u fut nga banka rezervë për t'i siguruar një pikë skuadrës së Sionit, ndërkohë që Kreshnik Hajrizi përjetoi momente kontraste, duke shënuar një autogol të pafat në portën e tij. Për sa i përket përbërjeve, Kreshnik Hajrizi dhe Donat Rrudhani e nisën takimin nga minuta e parë për Sionin, por u zëvendësuan së bashku në minutën e 72-të. Pikërisht në këtë moment, trajneri vendosi të inkuadrojë në fushë Rilind Nivokazin, lëvizje e cila rezultoi vendimtare për fatin e takimit, ndërsa në minutën e 80-të u aktivizua edhe Benjamin Kololli. Sioni pati mundësinë e artë për të kaluar në avantazh që në minutën e 56-të, por penalltia e ekzekutuar de Botellit u neutralizua me sukses nga portieri i Luzernit, Letica. Ngërçi i ndeshjes u thye në minutën e 65-të, kur Luzerni zhbllokoi shifrat. Pas një harkimi-gjuajtje nga distanca të Di Gustos, Kreshnik Hajrizi u gjend në vendin e gabuar dhe, në përpjekje e sipër për të larguar rrezikun me kokë, e devijoi topin në rrjetën e portierit Racioppi. Megjithatë, reagimi i mysafirëve nuk mungoi. Në minutën e 79-të, Sioni gjeti golin e barazimit përmes Rilind Nivokazit, i cili përfitojë nga një aksion i bukur dhe asistim i saktë i Lukembilës nga krahu. Pas këtij barazimi në 12 xhirot e para të kampionatit, Sioni pozicionohet në shkallën e tretë të tabelës me 23 pikë të grumbulluara, kurse Luzerni mbetet në vendin e tetë me 13 pikë në llogarinë e tij.