Fitoi 168 milionë euro në lotari, pastruesi me origjinë nga Kosova jeton në ankth për jetën e tij

Një histori përrallore pasurimi është shndërruar në një makth të vërtetë për një pastrues rrugësh me origjinë nga Kosova, i cili arriti të qëllojë jackpot-in prej 168 milionë eurosh në Belgjikë. Ndërkohë që vendi ka regjistruar sërish një fitues të ri të EuroMillions që do të përfitojë 153 milionë euro, fati i fituesit më të madh në histori të shtetit belg mbetet i zymtë. Burri, i cili punonte si fshirës rrugësh në Bruksel, po përballet me frikën e vazhdueshme për sigurinë e tij personale. Kur qëlloi shifrën astronomike në tetor të vitit të kaluar, ai u paraqit në punë edhe për dy ditë pranë kompanisë Net Brussel, para se të ndërpriste çdo kontakt dhe të largohej drejt Gjermanisë. Sipas burimeve mediatike, ai tashmë është rikthyer për të jetuar në Belgjikë, por rrethi i tij i ngushtë konfirmon se ai ndihet i rrezikuar nga persona me qëllime dashakeqe. Q., fshirësi i rrugëve nga Kosova, ndihet i penduar për vëmendjen e madhe mediatike që mori fitorja e tij, pasi kjo e ka detyruar të heqë dorë nga rutina e përditshme. Miqtë e tij tregojnë se ai e ka të pamundur të ndjekë më ndeshjet e skuadrës së tij të zemrës, FC Kosova në Bruksel. Ata bëjnë thirrje që ai të lihet i qetë, duke theksuar se çdo detaj i bërë publik shton rreziqet ndaj tij. Që nga momenti i fitores, ai është rikthyer vetëm dy herë në lagjen e tij të dikurshme dhe këtë e ka bërë i shoqëruar nga një truprojë, për shkak të frikës nga mundësitë e rrëmbimit apo shantazhit. Edhe pse vizitonte dikur klubin FC Kosova si një vend të sigurt ku njerëzit e njihnin, tani daljet e tij janë bërë të pamundura, ndërsa takimet me miqtë duhet të organizohen në fshehtësi të plotë. Sipas raportimeve, fituesi ka investuar në blerjen e një banese dhjetëra kilometra larg kryeqytetit belg, ndërsa njerëzit e afërt sqarojnë se një largim përfundimtar jashtë shtetit nuk ka qenë asnjëherë në planet e tij.