Debati pas “Topit të Artë”: Thierry Henry thyen heshtjen dhe sqaron batutën me Lamine Yamal

Legjenda e futbollit francez, Thierry Henry, ka ndërhyrë për të dhënë sqarimet e nevojshme lidhur me debatin e ndezur gjatë ceremonisë së ndarjes së “Topit të Artë” 2026 në Londër, ngjarje të cilën e moderoi në krah të gazetares britanike Kate Scott. Moment aluzionesh dhe keqkuptimesh u krijua në momentin kur Lamine Yamal u ngjit në skenë për të marrë çmimin “Kopa” për të tretin vit me radhë. Gjatë këtij momenti, ish-sulmuesi i njohur iu drejtua me një pyetje me ton humori: “A është ky çmimi që dëshiroje vërtet sonte?”. Kjo fjali u keqinterpretua nga disa ndjekës si një provokim apo thumbim ndaj talentit të Barcelonës, për shkak se ai nuk arriti të rrëmbente trofeun kryesor të mbrëmjes, “Topin e Artë”. Përballë këtyre reagimeve, Henry ka vendosur të vërtetën në vend, duke shpjeguar prapaskenën e atij momenti: “Kam parë mjaft diskutime rreth asaj që ndodhi në mbrëmjen e ‘Topit të Artë’, ndaj ndiej detyrimin t'u jap një përgjigje atyre që janë fyer kot së kotit”. “Në asnjë moment nuk kam pasur ndërmend t'i ulja vlerat apo t'i lëndoja egon Yamalit. Duke qenë se ky ishte triumfi i tij i tretë radhazi me këtë trofe, thjesht mendova t'i bëja një pyetje me të qeshur se cili ishte synimi i tij kryesor atë natë. Të gjithë e kuptojmë se cili ishte objektivi i tij madhor, të cilin fatkeqësisht nuk e arriti dot”, shtoi ai. Në përmbyllje të reagimit të tij, francezi shprehu hapur vlerësimin e lartë që ka për yllin spanjoll: “Ai bën pjesë në atë kategori lojtarësh për të cilët je i gatshëm të paguash biletën vetëm për t'i shijuar në fushë. Pasioni im për mënyrën se si luan është i jashtëzakonshëm. Bëhet fjalë për një futbollist fenomenal”.