Vrasja e Arlinda Zekajt në Pejë: Dalin detaje të reja për ish-bashkëshortin dhe kërcënimet e kaluara

Gjykata Themelore në Pejë ka zbardhur detaje shtesë lidhur me vendimin për caktimin e masës së paraburgimit ndaj Jeton Sylajt, i cili është ish-bashkëshorti i viktimës Arlinda Zekaj. Kjo e fundit u vra në mënyrë tragjike më 25 tetor në fshatin Vitomiricë të Pejës, duke tronditur opinionin publik. Gjatë seancës dëgjimore, Sylaj – i cili dyshohet për veprën penale “Mospërfillja e gjykatës” – ka kontestuar kërkesën e organit të akuzës për caktimin e paraburgimit. Ai ka argumentuar se prania e tij është e domosdoshme për shkak të kujdesit që i duhet djalit të tyre 12-vjeçar. “Kam fëmijën 12-vjeçar që tani nuk e di ku është, ka nevojë për kujdesin tim”, ka afirmuar Sylaj gjatë paraqitjes së tij para gjykatës, duke shtuar gjithashtu se ndjen keqardhje të thellë për ngjarjen fatale dhe se ka bërë përpjekje për ta shmangur atë: “Ndjej keqardhje për këtë çka ka ndodhur, jam munduar ta parandaloj”. Në anën tjetër, gjatë shqyrtimit të aktvendimit, prokurori i shtetit Argzon Hasi ka insistuar në masën e paraburgimit, duke argumentuar se plotësohen të gjitha kriteret ligjore. Ai ka bërë me dije se e ndjera Arlinda Zekaj, gjatë një faza hetimore kur ishte marrë në pyetje nga Njësiti për Hetimin e Dhunës në Familje, kishte denoncuar se ishte vënë në shënjestër të kërcënimeve nga ish-partneri i jetës. Sipas dëshmisë së dhënë nga vetë viktima para autoriteteve, Sylaj dyshohet se i ishte drejtuar asaj me fjalë kërcënuese dhe intimiduese: “Unë të thej, të mbys, çka lyp”.