Debat i ashpër në Komision për AKP-në, përplasje mes AAK-së dhe pushtetit për çmimet e tokave

Komisioni për Buxhet është mbledhur për të shqyrtuar raportin financiar të Agjencisë Kosovare të Privatizimit (AKP) për vitin 2025, mbledhje kjo që është shoqëruar me debate të ashpra dhe akuza të ndërsjella ndërmjet pozitës dhe opozitës. Gjatë këtij shqyrtimi, kryesuesi i Bordit të AKP-së, Hekuran Nikçi, sqaroi para deputetëve se përbërja aktuale e këtij bordi është zgjedhur nga Kuvendi i Kosovës më 27 prill 2026, çka do të thotë se mandati i tyre ka nisur pas periudhës kohore që përfshin ky raport financiar. Duke paraqitur shifrat zyrtare, Nikçi bëri të ditur se buxheti total i AKP-së për vitin 2025 kapte shifrën e rreth 4 milionë e 543 mijë eurove, derisa realizimi i shpenzimeve ka arritur në afërsisht 4 milionë e 312 mijë euro, respektivisht 94.9 për qind të fondit total të parashikuar. Sipas kreut të Bordit, pjesa dërrmuese e mjeteve financiare, saktësisht rreth 3 milionë e 307 mijë euro, është orientuar te pagat dhe kompensimet, ndërkohë që për mallra dhe shërbime janë harxhuar 841 mijë euro, për shërbime komunale 110 mijë euro dhe për investime kapitale vetëm 54 mijë euro. Nga ana e saj, deputetja Teuta Haxhiu ka drejtuar kritika të ashpra mbi mënyrën se si janë menaxhuar pronat shtetërore nga AKP-ja, duke sjellë në vëmendje një rast konkret në qytetin e Ferizajt dhe duke ngritur shqetësime lidhur me qëndrimet e pushtetit ndaj vendimeve të Gjykatës Kushtetuese. Haxhiu po ashtu ka adresuar akuza ndaj një deputeti të Lëvizjes Vetëvendosje për blerje tokash në Ferizaj me çmime simbolike. Këto pretendime janë kundërshtuar ashpër nga Ilir Kërçeli, i cili ka hedhur poshtë kritikat e opozitës për mënyrën e administrimit dhe shitjes së aseteve të ndërmarrjeve shoqërore, duke kujtuar praktikat e ndjekura gjatë qeverisjeve të kaluara. “Gjatë qeverisjes së AAK janë shitur 2 euro ari, 200 kontrata janë bërë me shitje direkte. Pse s’po i tregoni popullit? Pse po mundoheni me i qit hi syve? Nuk u shit 4 euro ari, 400 euro u shit ari. Toka në Ferizaj nuk u shit 2 euro ari, qysh e keni shitë ju, u shit 10 mijë euro ari. Mos hajde këtu me u mundu me i qit hi syve qytetarëve. Tregoni, gjatë mandatit të juaj, 200 kontrata në negocim, ka 2 euro ari e keni shitë. Prej vitit 2008 deri në vitin 2021, 500 milionë euro i keni shitë asete”, u shpreh Kërçeli gjatë përplasjes verbale në Komision.