Gërmimet në Mitrovicë të Veriut: Zbardhen detaje të reja dhe gjenden mbetje mortore

Në kuadër të përpjekjeve institucionale për zbardhjen e fatit të personave të zhdukur gjatë periudhës së luftës, gjatë ditës së djeshme, më 27 tetor, janë ndërmarrë gërmime vlerësuese në varrezat e qytetit të Mitrovicës së Veriut, konkretisht te “Varrezat e besimtarëve myslimanë”. Ky aksion është mbështetur nga Komisioni Qeveritar për Persona të Zhdukur (KQPZH) dhe Drejtoria e Policisë për Hetimin e Krimeve të Luftës (DHKL) – Sektori për Personat e Zhdukur, ndërsa në terren kanë operuar ekipet mjeko-ligjore të Institutit për Mjekësi Ligjore (IML) në bashkëpunim me ekspertët e EULEX-it. Këto punime në terren të zhvilluara më 27 tetor paraqesin vazhdimësinë e verifikimeve paraprake që kishin nisur në po këtë zonë më 20 tetor. Aksioni u ndërmarr në bazë të urdhrit gjyqësor, pas kërkesës zyrtare të dorëzuar nga Drejtoria e Policisë për Hetimin e Krimeve të Luftës përmes Prokurorisë, respektivisht Departamentit për Krime Lufte. Gjatë këtyre gërmimeve, autoritetet kanë lokuar, nxjerrë dhe siguruar mbetje mortore (eshtërore) me rëndësi mjeko-ligjore, të cilat dyshohet se u përkasin viktimave të luftës. Eshtrat e gjetura janë transportuar menjëherë në ambientet e Institutit për Mjekësi Ligjore për të kryer procedurat e nevojshme ekzaminuese, përfshirë analizat e ADN-së për identifikimin e saktë të tyre. “Komisioni Qeveritar për Persona të Zhdukur, në bashkëpunim me Institutin për Mjekësi Ligjore, Drejtorinë e Policisë për Hetimin e Krimeve të Luftës dhe institucionet e angazhuara në këtë proces, mbetet i përkushtuar në trajtimin dhe adresimin me prioritet të çdo informacioni që mund të kontribuojë në ndriçimin e fatit dhe vendndodhjes së personave të zhdukur me dhunë gjatë luftës në Kosovë”, theksohet në njoftimin zyrtar.