Ish-trajneri gjerman: Barcelona e Flick fluturon, por ka një pikë të errët që rrezikon sezonin

Bernd Schuster shpreh bindjen se skuadra e drejtuar nga Hansi Flick zotëron potencialin e duhur për të garuar me sukses në të gjitha frontet, përfshirë edhe Ligën e Kampionëve, ndërkohë që tërheq vëmendjen te problemet defensive. “E shoh Barçën të përgatitur për ta fituar Champions-in këtë sezon. Ky është objektivi madhor dhe do të gëzohesha për klubin dhe Flick, sepse vitet e fundit kanë ndërtuar diçka shumë të rëndësishme”, – ka shprehur opinionin e tij ish-lojtari gjerman në një intervistë për “Bild”. Pavarësisht entuziazmit, ai ka ngritur shqetësimin e qartë rreth prapavijës: “Për të triumfuar, Barcelona duhet të përmirësojë mbrojtjen. Për shkak të stilit shumë ofensiv, pëson rregullisht dy ose më shumë gola. Sulmi katalanas është ‘makinë’, por kundër rivalëve të mëdhenj, si Bayern Munich apo PSG-ja, nuk mund të shënosh gjithmonë kaq shumë”. Në analizën e tij, Schuster ka thurur elozhe për teknikun aktual: “Ai është një bekim për klubin. Ka ndërthurur filozofinë sulmuese të Barcelonës me disiplinën gjermane. Tani të gjithë vrapojnë për të rikuperuar topin, madje edhe Lamine Yamal”. Në fund, ai ka bërë një vlerësim pozitiv për gjendjen fizike të grupit, duke shtuar se talenti Yamal ka para vetes një perspektivë të jashtëzakonshme karriere, me kushtin parësor që të qëndrojë larg dëmtimeve.