Kriza klimatike, BE alarmohet: Evropa duhet të bëhet gati për një skenar me 3 gradë më të nxehtë

Komisioneri i Veprimit për Klimën, Wopke Hoekstra, ka bërë të ditur se Komisioni Evropian do të prezantojë këtë të martë standarde të reja mjedisore, duke kërkuar nga qeveritë e Bashkimit Evropian që të përcaktojnë qartësisht autoritetet përgjegjëse për sigurinë e qytetarëve përballë fatkeqësitë natyrore. Ky hap vjen në një kohë kur Brukseli lëshon alarmin se kontinenti i vjetër duhet të vetëdijësohet për fenomene meteorologjike gjithnjë e më shkatërruese, duke përfshirë këtu edhe parashikimet alarmante për një rritje të temperaturave globale deri në 3°C brenda vitit 2100. Duke folur për sfidat e ardhshme, Hoekstra theksoi se bota rrezikon të kapërcejë përkohësisht ose përgjithmonë kufirin prej 1.5°C të përcaktuar në Marrëveshjen e Parisit. Për këtë arsye, ai e cilësoi jetike që shtetet të marrin masa ndaj valëve të të nxehtit dhe katastrofave klimatike, pavarësisht suksesit të mundshëm të politikave për uljen e ndotjes. “U takon shteteve anëtare të vendosin se ku duan ta vendosin këtë përgjegjësi. Por ajo që ne e bëjmë të detyrueshme është që ato duhet të emërojnë dhe të artikulojnë se ku do të bjerë përgjegjësia”, u shpreh zyrtarë i lartë i BE-së. Megjithëse blloku evropian vijon përpjekjet për zvogëlimin e gazeve serrë, faturat financiare të përshtatjes me një klimë të ashpër po rriten frikshëm, duke përfshirë fondet e nevojshme për rimëkëmbjen pas zjarreve, vërshimeve të ujërave, si dhe përforcimin e banesave, akseve rrugore dhe objekteve publike. Komisioneri me origjinë holandeze llogariti se dëmet materiale të shkaktuara nga moti ekstrem gjatë kësaj vere i kanë kaluar shifrën e 100 miliardë eurove. I pyetur mbi ndikimin e një ngrohjeje prej 3°C mbi nivelin para-industrial, Hoekstra solli në vëmendje hartimin e planeve urbane të posaçme për të nxehtit dhe domosdoshmërinë e përshtatjes së rrjeteve infrastrukturore, duke lënë pas praktikat e vjetruara të parashikimit të motit. Sipas tij, kjo trajektore mbështetet mbi studime të thella shkencore, ku përfshihen raportet e Panelit Ndërqeveritar për Ndryshimet Klimatike dhe modelet e avancuara të BE-së për motin. Parashikimet institucionale flasin për një rritje prej 2°C deri në vitin 2050 dhe 3°C deri në mbyllje të shekullit për Evropën, një tregues ky se rajoni ynë po pëson një ngrohje me ritme dy herë më të shpejta se mesatarja planetare. Këto projektime synojnë të shërbejnë si bazë për vlerësimin e rreziqeve në nivel kombëtar dhe vendor, duke reflektuar ndikimet e ndryshme që rajone të ndryshme mund të përjetojnë. “Edhe nëse i bëjmë të gjitha këto siç duhet, nuk kemi asnjë mënyrë për të shmangur më shumë vera se ajo që pamë vitin e kaluar”, paralajmëroi Komisioni, duke nënvizuar se rezistenca dhe masat mbrojtëse duhet të ecin krah për krah me frenimin e emetimeve. Korniza e re ligjore do t'i detyrojë vendet anëtare të përcaktojnë saktësisht nëse nivelet qendrore, rajonale apo ato komunale mbajnë barrën e menaxhimit të krizave klimatike. Ndonëse qeveritë do të ruajnë autonominë se si t'i ndajnë këto detyra, ato do të jenë të detyruara të japin llogari qartë për çdo kompetencë, duke shmangur kështu përplasjet e mundshme politike në rast se dështohet në mbrojtjen e banorëve nga përmbytjet apo flakët. Në të njëjtën kohë, Komisioni kërkon që faktorët klimatikë të integrohen që në fazën e projektimit të rrugëve, urave dhe zonave të reja banimi, duke pranuar hapur se standardet e kaluara të ndërtimit nuk i përgjigjen më sfidave të kohës.