Tragjedia në Pejë: Sot i jepet lamtumira e fundit Arlinda Zekajt, i dyshuari mbetet ende në kërkim

Sot, më 27 tetor, do t'i jepet lamtumira e fundit Arlinda Zekajt, e cila u vra tragjikisht të dielën në fshatin Vitomiricë të Pejës. Ajo dyshohet se u privua nga jeta nga kunati i saj. Sipas njoftimit të lëshuar nga familjarët, ceremonia e varrimit të së ndjerës do të zhvillohet në orën 15:00, në fshatin Radac të Pejës. Nga ana tjetër, Policia e Kosovës ka bërë të ditur se i dyshuari për këtë krim të rëndë, Albert Sylaj, gjendet ende në arrati dhe organet e rendit po vijojnë kërkimet për kapjen e tij. Kjo ngjarje e rëndë ka tronditur thellësisht opinionin publik, duke rikthyer edhe një herë në vëmendje nevojën urgjente për luftimin e dhunës në familje dhe mbrojtjen e institucionalizuar të grave.