Triumf historik në Serbi: Lista studentore siguron shumicën absolute në parlament

Iniciativa qytetare e të rinjve, e njohur si lista studentore "Studentët po fitojnë", ka shpallur zyrtarisht triumfin e saj në zgjedhjet e jashtëzakonshme parlamentare në Serbi. Atmosfera festive ka shpërthyer menjëherë brenda selisë zgjedhore të studentëve, ku përfaqësuesit e kësaj lëvizjeje i drejtuan opinionit publik një thirrje për hapjen e një faqeje të re historike për vendin. Në mesazhin e tyre, studentët kërkuan nga qytetarët që gëzimin e fitores ta shfaqin në mënyrë të qetë dhe madhështore, duke shmangur çdo lloj përleshjeje apo tensioni të mundshëm. "I nxisim qytetarët ta festojnë këtë fitore në mënyrë paqësore, me dinjitet dhe krenari – mos u bini pre e provokimeve, mos u përfshini në konflikte dhe mos lejoni që asnjë përpjekje për të nxitur tensione të errësojë atë që kemi arritur së bashku. Le të jetë përgjigjja jonë ndaj çdo provokimi – dinjiteti; ndaj çdo fyerjeje – paqja dhe ndaj çdo përpjekjeje për të na përçarë – një solidaritet edhe më i fortë," u shprehën ata në deklaratën e tyre. Organizatorët e kësaj nisme vunë theksin te ruajtja e qetësisë, duke refuzuar çdo formë të sjelljes agresive gjatë festimeve. "Ne nuk u përpoqëm për muaj të tërë vetëm për të humbur, pikërisht sonte, ato gjëra që na kanë mbajtur të fortë gjatë gjithë kësaj kohe: besimin te drejtësia, solidaritetin dhe mos dhunën”. Gjatë fjalimit solemn të fitores, përfaqësuesit e studentëve e cilësuan këtë rezultat elektoral si pikënisjen e transformimeve rrënjësore në shoqërinë serbe. "Po nesër? Nesër fillon puna. Detyra serioze, e përgjegjshme dhe e vështirë për të ndërtuar një Serbi ku ligji vlen njësoj për të gjithë, ku e vërteta nuk ndëshkohet, ku dija respektohet, ku të rinjtë shohin një të ardhme për veten dhe ku askush nuk duhet të jetojë në frikë vetëm pse mendon ndryshe," theksuan ata. "Le të shënojë kjo natë fillimin e unë kapitulli të ri – një kapitull në të cilin ne nuk e ndajmë veten në fitues dhe humbës, por punojmë së bashku për të ndërtuar një vend ku secili ka të drejtë të shprehet, të njohë të vërtetën dhe të ketë një të ardhme. Sonte festojmë fitoren; duke filluar nga nesër, ndërtojmë të ardhmen. Rroftë liria! Studentët kanë fituar!" Mbështetur në projeksionet paraprake të publikuara nga organizatat CeSID dhe Ipsos, Lista Studentore ka arkëtuar rreth 52 për qind të mbështetjes qytetare, gjë që pritet t'i sigurojë asaj 138 ulëse në Kuvend, duke i garantuar kështu një shumicë të qëndrueshme dhe të pavarur qeverisëse.