Plagosja e rëndë në Tiranë, mjeku denoncon skandalin: Pse e zbritën 28-vjeçarin nga ambulanca?

Një dëshmi e fortë ka hedhur dritë mbi prapaskenat e ngjarjes së rëndë të 24 tetorit në kryeqytet, ku 28-vjeçari Erjon Vishkulli u godit në sy nga një plumb gome dhe aktualisht rrezikon seriozisht të humbasë shikimin. Mjeku Ermal Pasha ka treguar detaje tronditëse për momentet kritike pas plagosjes, duke ngritur akuza të rënda ndaj autoriteteve për pengimin e dhënies së ndihmës mjekësore dhe trajtimin e të riut. Në një rrëfim televiziv për News24, Pasha ka sqaruar se ka qenë pranë vendit të ngjarjes dhe është përpjekur me çdo kusht t'i vijë në ndihmë të plagosurit, por është ndalur nga forcat e sigurisë. Sipas tij, pavarësisht se është identifikuar qartësisht si staf mjekësor, duke hequr maskën dhe syzet mbrojtëse, atij i është mohuar mundësia për të afruar ndihmën e parë jetësore. Më tej, mjeku ka ngritur pikëpyetje serioze lidhur me dinamikën e transportimit të Vishkullit në spital. Ai ka denoncuar faktin se i riu ishte futur fillimisht brenda një mjeti shëndetësor të policisë, por papritur është zbritur prej tij, duke kërkuar llogari publike se kush qëndron pas këtij urdhri. "Ishte një moment kur pashë një person të shtrirë matanë Lanës dhe turma ishte mbledhur rreth tij. Së pari mendova për asfiksi nga gazrat, por kur pashë se situata po rëndohej, u përpoqa të afrohesha. Isha i vetëm. U prezantova se kush isha, por më ndaluan", ka deklaruar Pasha. Në përmbyllje të dëshmisë së tij, mjeku ka kërkuar transparencë institucionale për një nga detajet më të dyshimta të operacionit të asaj dite. "Si ka mundësi që i plagosuri u fut në ambulancën e policisë dhe më pas u zbrit? Kush e dha këtë urdhër? Ai u mor fillimisht nga një automjet i blinduar i përshtatur si ambulancë, i njëjtë me ata që përdoren për transportimin e gazit lotsjellës", u shpreh ai.