Trajtimi i protestuesit në Itali shkakton replika, mjeku Ermal Pasha: Për këtë dështim të shëndetësisë po ngrihemi në protestë

Mjeku Ermal Pasha ka drejtuar kritika të ashpra ndaj kryeministrit Edi Rama lidhur me qëndrimin e mbajtur pas plagosjes së rëndë të 28-vjeçarit Erjon Vishkulli. I riu u godit në sy nga një plumb gome gjatë zhvillimit të protestës më 24 tetor dhe më pas u nis drejt Italisë për të marrë kujdes mjekësor të specializuar. Në një prononcim televiziv, Pasha u shpreh se fakti që një shtetas shqiptar detyrohet të udhëtojë jashtë vendit për një ndërhyrje kirurgjikale dëshmon qartë kufizimet dhe mungesën e kapaciteteve në sistemin tonë shëndetësor publik. Mjeku shtoi se protesta e zhvilluar, e 13-ta me radhë që nga nisja e valës së revoltës studentore, u karakterizua nga një atmosferë tronditjeje për shkak të ngjarjes së rëndë me të riun. Si shenjë e qartë solidariteti, shumë prej pjesëmarrësve kishin vendosur fasha në njërin sy. "Dita e sotme ishte një tronditje për të gjithë protestën pas fatkeqësisë së djeshme, që ishte një ditë shumë e ngarkuar dhe nuk kishte pse të merrte atë lloj rrjedhe. Për t’u bashkuar me dhimbjen dhe fatkeqësinë, shumë protestues kishin mbuluar njërin sy me fashë," – u shpreh Pasha, duke përdorur edhe shprehjen popullore "Rama të vret e të qan" për të kritikuar retorikën e kreut të qeverisë. Megjithëse vlerësoi punën e stafit mjekësor të Spitalit Universitar të Traumës për ndihmën e parë që i dhanë pacientit, ai ngriti alarmin se infrastruktura shëndetësore vendase dështoi t'i sigurojë trajtimin e duhur brenda vendit. "Duke falënderuar mjekët e Spitalit Ushtarak, që kanë bërë një punë të mrekullueshme për ndihmën e parë, transferimi i sotëm na çon në një situatë që e ka ndezur edhe më shumë revoltën. Në kaq vite kemi ende pamundësi të mjekësisë shqiptare për të trajtuar një kirurgji relativisht të vështirë në sy," – deklaroi ai. Sipas tij, është anormale që Shqipëria, pavarësisht se trajnon profesionistë të fushës mjekësore ndër vite, mbetet e paaftë të menaxhojë raste të tilla urgjente pa iu drejtuar ndihmës ndërkombëtare. "Një shkollë që nxjerr prej vitesh specialistë ende nuk ka mundësitë e nevojshme dhe detyrohet që një pacient të transferohet për të marrë shërbim jashtë kufijve shqiptarë. Na u dashkan mënyrat e bamirësit që ngre në këmbë shërbimet e shtetit për t’i dhënë ndihmë një njeriu jashtë vendit," – u shpreh tutje ai. Pasha nënvizuar se pikërisht ky deficit në shërbime dhe mungesa e perspektivës për qytetarët përbëjnë arsyet kryesore pse të rinjtë kanë mbushur sheshet në shenjë pakënaqësie. "Për këtë protestojmë! Jemi një vend që nuk ka kapacitetet t’u shërbejë shtetasve të vet," – theksoi mjeku. Gjatë fjalës së tij, ai nuk la pa përmendur edhe ndikimin negativ të nepotizmit në strukturat shtetërore, duke përfshirë radhët e policisë dhe institucionet shëndetësore. "Nepotizmi shtrihet në polici, ku nuk mendoj se nuk e dinë që, po të qëllosh në lartësinë e kokës, mund të shkaktosh dëme të tilla, ashtu siç ndikon edhe në ndihmën që mund të marrin pacientët në spitale," – përfundoi Pasha.