Përplasje deklaratash në familjen e të riut të plagosur në protestë: Vëllai hedh poshtë motrën dhe falënderon shtetin

Ngjarja e rëndë e regjistruar gjatë protestës së 24 tetorit në Tiranë, ku 28-vjeçari Erjon Vishkulli mbeti i plagosur rëndë në sy nga një plumb gome dhe u transportua drejt Italisë për ndërhyrje të specializuar, ka sjellë qëndrime kontradiktore brenda vetë familjes së tij. Pasi motra e të riut mohoi çdo ndihmë nga ana e qeverisë, duke pohuar në rrjetet sociale se dërgimi i tij jashtë vendit u realizua ekskluzivisht nga familjarët, miqtë dhe dashamirësit, vëllai i tij ka dalë me një version krejtësisht ndryshe të ngjarjes. Në një prononcim të shpërndarë gjithashtu nga kryeministri Edi Rama, vëllai i Erjonit ka sqaruar se institucionet shtetërore kanë qenë plotësisht në mbështetje të tyre që nga momenti i parë. Sipas tij, shteti është kujdesur për çdo detaj logjistik dhe mjekësor, duke siguruar një avion të posaçëm dhe ekip mjekësor të specializuar për udhëtimin e sigurt të të riut drejt spitaleve italiane. Sa i përket gjendjes shëndetësore, vëllai ka bërë me dije se ajo paraqitet e stabilizuar dhe se dita e nesërme do të jetë vendimtare, pasi 28-vjeçari pritet t'i nënshtrohet operacionit të dytë kirurgjik. Familja mbetet me shpresa të plota për një rikuperim të plotë të Erjonit dhe kthimin e tij sa më parë pranë familjes. Në reagimin e saj të mëparshëm, motra e të plagosurit kishte theksuar: "Ju falënderojmë të gjithëve që jeni interesuar dhe shqetësuar për shëndetin e vëllait tonë, por duam që në këto momente të qëndrojmë larg pjesës politike. Falënderojmë personat që morën iniciativën për një ndërhyrje më të specializuar në Itali. I bëjmë thirrje mediave të mos shpërndajnë lajme pa bazë për shikime apo për propaganda, për ta kthyer çështjen në politike. Transferimi është bërë nga familja, miqtë dhe mbështetësit tanë dhe JO nga shteti. Të duam pa fund Erjon, kthehu në shtëpi shëndosh e mirë!" Nga ana tjetër, vëllai i 28-vjeçarit është shprehur: "Gjendja e Erjonit për momentin duket e stabilizuar, na kanë dhënë fjalë të mira dhe shpresojmë që vëllai të kthehet pranë nesh siç e patëm. Kemi udhëtuar me avion të posaçëm me mjekë që ishin përgatitur kastile për vëllanë. Për çdo lloj iniciative, na janë përgjigjur strukturat shtetërore, që nga avioni e çdo gjë tjetër. Të gjitha kanë ardhur nga strukturat shtetërore. Nesër bëhet operacioni i dytë dhe shpresojmë të kemi lajme të mira."