Tensionet në Beograd: Një grup personash futet në kampin e simpatizantëve të pushtetit pranë Presidencës serbe

Një grup prej disa dhjetëra personash me kapela janë futur brenda hapësirës së kampit me tenda, i cili ndodhet në afërsi të Presidencës së Serbisë në kryeqytetin serb. Ky kamp, i njohur ndryshe me emrin “Çacilend”, shërben prej një viti e gjysmë si pikëqëndrim për mbështetësit e strukturave qeverisëse. Fillimisht, ky grup u tubua në sheshin “Nikolla Pashiq”, i cili ndodhet pranë vendndodhjes së kampit, ndërsa më pas marshuan drejt objektit të Presidencës. Efektivët e policisë i lejuan ata që të futeshin brenda perimetrit të kampit, sipas informacioneve të siguruara nga terreni. Në të njëjtën kohë, forca të shtuara të rendit, të pajisura me mjete speciale për menaxhimin e turmave dhe shpërndarjen e protestave, janë pozicionuar në zonën përreth ndërtesës së Kuvendit të Qytetit të Beogradit, pranë Komisionit Republikan të Zgjedhjeve, si dhe në afërsi të Presidencës. Perimetri ku gjenden Komisioni Zgjedhor dhe Presidenca është vendosur nën një bllokadë të plotë nga të gjitha anët. Konkretisht, autoritetet nuk lejojnë qarkullimin e askujt në këtë zonë të kufizuar, duke përfshirë këtu edhe përfaqësuesit e mediave. Prania e forcave policore është shtrirë gjithashtu edhe në hapësirën e parkut që shtrihet mes ndërtesës së Presidencës dhe asaj të Kuvendit të Qytetit, lokacion ky ku është i vendosur edhe kampi në fjalë.