“Plumbin e kam ende në sy” – Rrëfimi prekës i 28-vjeçarit të plagosur në protestë para nisjes urgjente për në Itali

Një goditje e papritur, disa hapa të bllokuar nga dhimbja dhe më pas rrëzimi në tokë. Kështu e sjell ndërmend Erjon Vishkulli çastin kritik kur u qëllua në sy nga një plumb gome gjatë zhvillimit të protestës. Mes vuajtjeve fizike dhe frikës se mund të humbasë përgjithmonë shikimin, ai ka ndarë detajet e ngjarjes për herë të parë, pak çaste përpara se jeta e tij të merrte këtë kthesë të dhimbshme. Objekti goditës ndodhet ende i bllokuar në syrin e tij të majtë, ndërsa e vetmja shpresë mbetet te ndërhyrja kirurgjikale jashtë vendit. “Shkova të takoja shokët dhe do të ikja. Kisha hequr maskën e oksigjenit dhe në atë moment takova një shok gazetar. I kisha diku 30 metra larg policët, pa asnjë reagim, pa asgjë. Vetëm kur më vjen një goditje, eca rreth dy metra dhe rashë në tokë”, tregon ai. Ngjarja u shpalos në pak sekonda. Erjoni shpjegon se vetëdija e tij pas plagosjes ishte e kufizuar. Ai kujton vetëm ndihmën e menjëhershme të një miku, i cili e dërgoi me automjet drejt institucionit shëndetësor, ku nisi një tjetër kalvar mundimesh dhe ankthi për fatin e syrit të tij. “Isha pak i vetëdijshëm, ndërkohë që një shok më shoqëroi me makinë. Kaq mbaj mend pastaj”, u shpreh ai. Prania e plumbit të gomës në organin e të pamurit vazhdon të përbëjë rrezikun kryesor. I riu pranon se situata është tejet e rëndë dhe e shoqëruar me dhimbje të forta, ndërkohë që prognoza mbetet ende e paqartë. “Vazhdoj ta kem ende plumbin e gomës në sy. Nuk e di tani të them se sa i lartë është rreziku, por e lehtë nuk është, sepse kam shumë dhimbje”, u shpreh ai. Përballë kësaj situate kritike, mjekimi i avancuar jashtë vendit është kthyer në mundësinë e vetme shpëtuese. Pas angazhimit të stafit spitalor dhe familjarëve, është bërë i mundur organizimi i udhëtimit të tij drejt një klinike të specializuar në Romë, ku do t'i nënshtrohet trajtimit mjekësor pasditen e sotme. Megjithëse i rrethuar nga pasiguria dhe vuajtja, dëshmia e Erjonit pëyllet me një thirrje sfiduese: “Vetëm fitore”. Një mesazh që, pas gjithë asaj që ka kaluar, merr një peshë edhe më madhore. “Vetëm fitore. Shqipëria është e jona”, e mbyll ai rrëfimin e tij.