Bilanci i dhunës në Tiranë: Pranga 23 protestuesve, dhjetëra të tjerë në kërkim dhe procedim penal

Autoritetet policore në kryeqytet kanë ndërmarrë një aksion pas protestës së djeshme të dhunshme në Tiranë, duke prangosur 23 persona, duke nisur procedimin penal për 13 të tjerë, si dhe duke shpallur në kërkim 30 qytetarë të dyshuar si pjesëmarrës në aktet e dhunës gjatë tubimit. Sipas informacioneve zyrtare nga Policia e Shtetit, gjatë zhvillimit të protestës, forcat e rendit janë përballur për disa orë me radhë me sulme të organizuara. Protestuesit kanë përdorur gurë, vida, sfera metalike, shkopinj druri dhe hekuri, lëndë piroteknike, kokteje Molotov, si dhe bombola gazi të pajisura me kapsolla shpërthyese. Si pasojë e përleshjeve dhe dhunës së ushtruar ndaj forcave të rendit, disa efektivë të policisë kanë pësuar dëmtime fizike dhe janë dërguar për marrjen e ndihmës së nevojshme mjekësore. Në njoftimin zyrtar të policisë jepen detajet e personave të ndaluar: “U arrestuan shtetasit J. B., 54 vjeç, L. B., 48 vjeç, D. Zh., 36 vjeç, Xh. M., 27 vjeç, M. S., 38 vjeç, K. F., 25 vjeç, V. L., 29 vjeç, E. Zh., 34 vjeç, Xh. M., 30 vjeç, A. E., 38 vjeç, R. K., 23 vjeç, E. N., 26 vjeç, M. Sh., 33 vjeç, R. H., 27 vjeç, B. O., 18 vjeç, E. N., 28 vjeç, L. N., 25 vjeç, O. A., 19 vjeç, J. Z., 35 vjeç, R. V., 31 vjeç, V. A., 20 vjeç, E. Xh., 39 vjeç dhe R. D., 31 vjeç; Ndërkohë u proceduan penalisht 13 shtetas si dhe u shpallën në kërkim 30 shtetas”. Përveç lëndimeve të efektivëve, gjatë këtij tubimi janë shënuar edhe dëme materiale, ku disa prej godinave të institucioneve shtetërore janë dëmtuar nga veprimet e dhunshme të turmës. Grupi i posaçëm hetimor po vijon punën intensive në terren për zbardhjen e plotë të ngjarjeve, identifikimin e autorëve të tjerë të përfshirë në incidente dhe vënien e tyre para drejtësisë.