Tragjedi në autostradën Prishtinë-Ferizaj: Publikohet identiteti i 22-vjeçarit që vdiq në aksidentin me dy vetura

Janë zbardhur detaje të reja lidhur me aksidentin e rëndë rrugor të regjistruar mbrëmjen e së shtunës në aksin Prishtinë–Ferizaj, ku jeta e një motoçiklisti u shua pas një përplasjeje të fuqishme me dy automjete. Burimet tona bëjnë me dije se i riu që humbi jetën tragjikisht është Çlirim Aliu, vetëm 22 vjeç. Ngjarja e rëndë ka ndodhur më 24 tetor, rreth orës 23:11, në territorin e fshatit Llapnasellë. Sipas të dhënave zyrtare, në këtë përplasje fatale u përfshinë një motoçikletë e markës Yamaha dhe dy vetura, konkretisht një Volkswagen Passat dhe një BMW. Si pasojë e goditjes së fortë, drejtuesi i motoçikletës ka pësuar plagë të rënda, të cilat ishin fatale për jetën e tij. Ekipi mjekësor i urgjencës, pasi ka dalë në vendin e ngjarjes, ka mundësuar vetëm konstatimin e vdekjes së viktimës. Forca të shumta policore, përfshirë njësitet patrulluese dhe hetuesit e Njësisë Rajonale të Komunikacionit Rrugor, kanë dalë menjëherë në vendin e ngjarjes për të kryer hetimet e para. Për rastin është njoftuar Prokurori i Shtetit, ndërkohë që trupi i pajetë i të riut është dërguar për obduksion në Institutin e Mjekësisë Ligjore me urdhër të prokurorit. Autoritetet kompetente po vazhdojnë hetimet intensive për të zbardhur plotësisht shkaqet dhe rrethanat e sakta që çuan drejt këtij fataliteti.