Ronela Hajati tregon shifrat marramendëse: Ja sa ka fituar nga hiti i saj i Eurovisionit

Këngëtarja e njohur shqiptare, Ronela Hajati, ka qenë e ftuar mbrëmjen e sotme në emisionin “Live me Luizin”, ku ka ndarë me publikun detaje nga jeta personale, rrugëtimi i saj muzikal, si dhe ka komentuar ngjarjet aktuale në vend. Gjatë bisedës, moderatori Luiz Ejlli nuk ka hezituar ta ngacmojë artisten rreth të ardhurave që ajo siguron nga projektet e saj muzikore, duke e vënë theksin te fitimet financiare. Duke iu përgjigjur pyetjeve të Luizit, Hajati ka zbuluar se kënga e saj përfaqësuese në Eurovision, “Sekret”, i ka sjellë rreth 30 deri në 40 mijë dollarë fitime vetëm nga platforma e transmetimit Spotify. Megjithatë, vetë artistja i ka cilësuar këto të ardhura si tepër të ulëta, duke u shprehur se në krahasim me shifrat që arkëtojnë hite të tjera të muzikës shqiptare, kjo shumë duket pothuajse qesharake.