Inovacioni i radhës nga Samsung: Detajet e parë për smartfonin e ri të palosshëm

Gjiganti teknologjik Samsung duket se nuk ka ndërmend të ndalet dhe po bëhet gati për një tjetër lansim të rëndësishëm. Më 29 tetor, kompania do të prezantojë zyrtarisht pajisjen e re të palosshme, e cila mban emrin Galaxy W27. Ky model i ri pritet të ndërtohet mbi bazën e Galaxy Z Fold 8 Ultra, ndërsa ajo që bie në sy në pamjen e parë është dizajni i tij tejet elegant, i kombinuar në ngjyrë të kaltër dhe me detaje të arta. Sipas informacioneve të ndara nga analisti i njohur Ice Universe, në zemër të këtij telefoni do të vendoset procesori i fuqishëm Snapdragon 8 Elite Gen 5, i shoqëruar me deri në 16 GB RAM dhe hapësirë ruajtjeje që arrin deri në 1 TB. Në fushën e fotografisë, pajisja parashikohet të vijë e pajisur me një sensor kryesor prej 200 megapikselësh. Ndërkohë, autonomia do të mbështetet nga një bateri me kapacitet 5,000 mAh, e cila do të lejojë edhe karikim me kabllo prej 45 W. Modeli Galaxy W27 vjen si pjesë e traditës tashmë të njohur të Samsung për të sjellë në treg pajisje të palosshme me karakter luksoz, të orientuara kryesisht drejt tregut në Kinë. Pyetja kryesore që mbetet për t'u zbuluar është nëse kjo pajisje e re do të ofrojë funksionalitete shtesë, përtej pamjes luksoze dhe specifikave teknike tashmë të lakuara. Megjithatë, duhet theksuar se të dhënat e deritanishme ende nuk kanë marrë një konfirmim zyrtar nga ana e kompanisë, ndërsa ende nuk ka asnjë informacion të qartë nëse ky telefon do të shitet edhe në tregjet jashtë kufijve të Kinës.